Eljan Birtanov: Vaktsınatsııa májbúrli shara emes
«Vaktsınatsııalaý – qazirgi Kodeks pen jańa Kodeks jobasy boıynsha kez kelgen adamǵa kelisimi arqyly ǵana (nemese zańdy ókiliniń kelisimi – balanyń ata-anasy) jasalady. Kez kelgen adam (ata-ana) odan bas tarta alady. Ol májbúrli emes. Áıtse de halyqty vaktsınatsııalaý – ınfektsııa epıdemııasynan halyqtyń qorǵaýdyń birden-bir ǵylymı negizge ıe ári dáleldengen amaly. Bul memlekettik densaýlyq saqtaýdyń mindetti sharasy», - dep jazdy Eljan Birtanov Facebook paraqshasynda.
Mınıstr «eger vaktsınatsııa mindetti bolmaıtyn bolsa – perzenthanalar men aýrýhanalardyń dárigerleri úshin mindetti bolmaıtynyn» jetkizdi.
«Bizge bul vaktsınalardy satyp alý kerek bolmaı qalady. Jylyna 4 mıllıonnan astam balaǵa týǵan kezde jáne týǵannan keıin memleket esebinen polıomıelıt, týberkýlez, sirespe, qyzylsha, kókjótel, gepatıt, pnevmonııaǵa qarsy ekpe jasalmaıdy», - dep túıdi Eljan Birtanov.
Aıta keterligi Parlament Májilisiniń depýtattary «Qazaqstan Respýblıkasynyń densaýlyq saqtaý máseleleri boıynsha keıbir zańnamalyq aktilerge ózgerister men tolyqtyrýlar engizý týraly» zań jobasyn maquldaǵan bolatyn. Іzinshe ekpelerdiń bárin de mindetti jáne erikti dep ekige bólý týraly sheshim qabyldandy.