Eljan Birtanov tegin dári-dármektiń satylýymen kúres qalaı júrgiziletinin aıtty
«Bizde tegin dári-dármek 2005 jyldan bastap beriledi jáne jyl saıyn onyń tizimin keńeıtip jatyrmyz. Memleket qosymsha qarjy da bóledi. Eń mańyzdy másele - osy tegin dári-dármektiń ár naýqasqa tikeleı jetýi. Biz ony baqylaýda ustaýǵa tıispiz. Ótken jyldary kóptegen naýqas adam bizge habarlasyp, tegin dárilerdi ala almaǵandyqtaryn nemese uzaq kútetindikterin aıtqan edi. Onyń sebebi josparlaýǵa baılanysty boldy. Aıtalyq, arterıaldyq gıpertenzııamen aýyratyn 30 myńnan astam adamǵa dári-dármekti josparly túrde satyp alý úshin biz tikeleı naýqastardan aqparat bilýimiz qajet edi», - dedi mınıstr búgin BAQ ókilderimen kezdesýi barysynda.
Onyń aıtýynsha, 2015-2016 jyldary syrqat jandardan qajetti aqparattardy jınaý qaǵaz túrinde júrgizildi. Al bul kezeginde qajetti tegin dári-dármekti satyp alý josparynyń orynalýyna kedergi keltirip otyrdy. Sondyqtan salaǵa tsıfrlandyrý júrgizilip, sozylmaly aýrýlarmen aýyratyn adamdar arnaıy tizimge alyndy. Bul jumys 2018 jyly tolyq aıaqtaldy. Al 2019 jyldan bastap sol tizim arqyly ǵana dárigerdiń retseptimen tegin dári-dármekter naýqastarǵa berile bastady.
«Ótken jyly osy tegin beriletin dáriler jeke dárihanalardan nemese shetelden tabyldy. Biz muny ózimiz anyqtap, quqyq qorǵaý organdaryna, Bas prokýratýraǵa bergenbiz. Osy fakti boıynsha 28 qylmystyq is qozǵaldy. Ótken jyldyń jeltoqsan aıynda Shymkent qalasy men Túrkistan oblysynda birneshe medıtsıalyq qyzmetker osyndaı qylmyspen ustalyp, sharalar qabyldandy. Degenmen, muny baqylaýǵa kelgende birqatar qıyndyq bar. Qazirgi zańǵa sáıkes bizdiń memlekettik organdar, máselen farmatsııa qyzmetkerleri, ınspektorlar jeke dárihanalardy, klınıkalardy teksere almaıdy. Sondyqtan qazir kodekske arnaıy normalar engizip jatyrmyz. Mysaly, azamattardyń densaýlyǵyna baılanysty memlekettik baqylaý múmkindigin keńeıtý, dári-dármektiń sapasyn, baǵasyn jáne jetkilikti ekendigin baqylaý úshin múmkindik jasaý kózdelip otyr», - dedi Eljan Birtanov.