Eljan Birtanov sot otyrysynda jeke jáne qyzmettik jazbalardy oqyp berdi

ASTANA. QazAqparat – Astanada Qazaqstannyń burynǵy densaýlyq saqtaý mınıstri Eljan Birtanov jáne onyń burynǵy orynbasary Oljas Ábishevke qatysty sot protsesi jalǵasyp jatyr, dep habarlaıdy QazAqparat tilshisi.

Eks-mınıstr men onyń burynǵy orynbasaryna qatysty qylmystyq is Astana qalasy Saryarqa aýdandyq №2 sotynda qaralyp jatyr.

Sot otyrysy barysynda Eljan Birtanov kezinde orynbasary bolǵan Oljas Ábishevpen aradaǵy birqatar jeke jáne qyzmettik jazbany oqyp berdi.

Onyń aıtýynsha, atalǵan jazbalar aqparattandyrý platformasyn engizýge qatysty obektıvti problemalarǵa qaramastan, jumystyń tyńǵylyqty júrgenin dáleldeıdi.

«Eshqandaı jumys júrmese, biz bekerge pıar jasamas edik. Barlyq habarlama men dokladtarda platformany engizý jumysynyń aıaqtalýǵa jaqyn ekendigi jáne onyń 2018 jyldyń 7 jeltoqsanynda qabyldanatyny týraly aıtylady», - dedi Eljan Birtanov sot aldynda.

Sondaı-aq, densaýlyq saqtaý mınıstrliginiń burynǵy basshysy oǵan taǵylǵan aıyptaýlardy rastaıtyn faktilerdiń joqtyǵyn aıtty.

Eske salsaq, Eljan Birtanov 2020 jyldyń 3 qarashasynda bıýdjet qarajatyn ysyrap etti degen kúdikpen qamaýǵa alynǵan bolatyn.

Atap aıtqanda, Eljan Birtanov pen onyń burynǵy orynbasary Oljas Ábishev «laýazymdyq ókiletin teris paıdalaný» arqyly memleketke 1,5 mlrd teńge shyǵyn keltirdi dep aıyptaldy.

Bıyl qańtarda qylmystyq is sotqa túsken edi. Al, 12 mamyrda sot Eljan Birtanovqa qatysty qylmystyq isti toqtatýdan bas tartty .