Eljan Birtanov sapasyz maıdyń qaı elderden keletinin aıtty
«Jalǵan ónimniń basym bóligi sút jáne maı ónimderine tıesili. Osy salada ósimdik maıy bar ónimder tabıǵı ónim retinde satylǵan. Mysaly, eki myń sút jáne maı ónimderiniń 29 protsenti sapasyz dep tanylǵan. Negizi, atalǵan taýarlardyń kóbisi Reseı, Belarýs, Ýkraına, Qyrǵyzstan men Frantsııadan keledi», - deıdi E.Birtanov.
Mınıstrdiń sózine qaraǵanda, osy ýaqytqa deıin halyq jıi tutynatyn 42 myńnan astam taýardyń túri sanıtarlyq-epıdemıologııalyq tekseristen ótti. Sonyń 10,3 protsenti standartqa saı emes bolyp shyqty. «Tamaq ónimderiniń 34 myńnan astam synamasy zertteldi. 224 synama talapqa saı kelmeıdi. Birinshiden, óndirýshiler tańbalaý erejelerin buzady. Ekinshiden, taýarlar qaýipsizdik talaptaryna saı emes. Sosyn ónimniń quramyna qatysty san alýan tártipbuzýshylyqtar bar», - dep atap kórsetti E.Birtanov.
Resmı málimetke sáıkes, tekseristerdiń nátıjesinde 20 tonna kondıterlik ónimder, 11,2 tonna et, 2,5 tonna sút ónimderi, 1,2 tonna konservilengen jemis-jıdek jáne 160 partııa alkogoldik ónimder tárkilendi. Tonnadan asatyn sapasyz oıynshyqtar da anyqtaldy. Ol oıynshyqtardyń basym bóligi Qytaı men Túrkııadan jetkizilgen.