Eljan Birtanov sanıtarlyq-epıdemıologııalyq qyzmetke kadr daıarlaý boıynsha keńes ótkizdi
Selektorlyq rejımde ótken keńeske atalǵan vedomstvonyń vıtse-mınıstrleri, qurylymdyq bólimsheler men uıymdardyń basshylary, medıtsınalyq JOO rektorlary, ǵylymı ortalyqtar dırektorlary jáne salaǵa qatysty ózge de uıym ókilderi qatysty.
Densaýlyq saqtaý mınıstrligi sanıtarlyq-epıdemıologııalyq qyzmetti kadrlarmen qamtamasyz etý úshin qysqa ári orta merzimderge arnalǵan sharalardy usyndy.
Qysqa merzimde sharalar aıasynda bakalavrıattaǵy 120 túlekti sanıtarlyq dárigerlikke (epıdemıologtar), qoǵamdyq densaýlyq saqtaý mamandyǵyna jáne gıgıenashylyqqa mamandandyrý eskerilgen. Ol úshin stýdentter epıdemıologııanyń qosymsha saǵattaryn ıgerýi tıis.
Aıta keteıik, mınıstrlik qysqa merzimde epıdemıologııalyq qyzmet boıynsha 300 mamandy qaıta daıarlaýdy jáne 9 myń medıtsına qyzmetkeriniń biliktiligin arttyrýdy josparlap otyr.
Budan bólek, orta merzimdegi sharalar aıasynda úshinshi kýrstan bastap bilim berý traektorııalary turǵysynda (epıdemıologııa jáne gıgıena) «qoǵamdyq densaýlyq saqtaý» mamandyǵynyń stýdentteriniń profılızatsııa sharasy usynyldy. Beıindi magıstratýrada epıdemıologııa, gıgıena, densaýlyq saqtaýdaǵy menedjment mamandyqtary boıynsha daıarlaý josparlanýda. Doktorantýrada ǵylymı-pedagogıkalyq kadrlardy maqsatty daıarlaý jalǵasady.
⠀Keńes barysynda respýblıkalyq sarapshylar kadrlar daıarlaýdy reformalaý jáne sanıtarlyq-epıdemıologııalyq salada qyzmetkerlerdiń áleýetin arttyrý boıynsha sharalar josparyn talqylady.
