Eljan Birtanov: Patsıentterdiń agressııaly bolýyna ózimiz kinálimiz

ASTANA. QazAqparat - Qazaqstannyń jeke klınıkalarynda telemedıtsına júıesi engizilýde. Bul týraly búgin densaýlyq saqtaý salasyndaǵy úkimettik emes uıymdardyń ókilderimen kezdesken QR Densaýlyq saqtaý mınıstri Eljan Birtanov aıtty, dep habarlaıdy QazAqparat.

«Telemedıtsına túrli deńgeıdegi dárigerlerdiń arasynda baılanys quraly bolyp keldi. Búginde telemedıtsına máselesi qatty ózgeriske ushyrap otyr. Óıtkeni, taǵy bir qatysýshy ári eń bastysy - patsıent qosyldy», - dedi mınıstr.

Onyń aıtýynsha, búginde telemedıtsınada patsıent pen dáriger arasyndaǵy yntymaqtastyq baǵyty damýda. Sondyqtan da elimizdegi jeke klınıkalarda telemedıtsına qarqyndy engizilý ústinde. Buǵan qosa telemedıtsına azamattardyń múddesin qorǵaýǵa da baǵyttalǵan. Óıtkeni, qazirgi ýaqytta halyqtyń tehnıkalyq múmkinshilikteri óte joǵary.

Munan bólek, mınıstr medıtsına qyzmetkerleriniń patsıentter tarapynan agressııa bar dep shaǵymdana berýi durys emestigin basa aıtty.

«Medıtsına qyzmetkerlerimen kezdesken kezde patsıentterdiń tarapynan úzdiksiz agressııaǵa shaǵymdana bermeı, olardyń yǵyna jyǵyla bilý de kerektigin de únemi aıtyp kelemin. Patsıentter tarapynan agressııanyń bar ekendigi sózsiz. Alaıda, búgingi kúni mundaı agressııalardyń oryn alýyna ózimiz de kinálimiz. Óıtkeni, biz adamdarmen jumys isteı almaımyz», - dedi Eljan Birtanov.