Eljan Birtanov: Náreste ólimin jasyryp qalýdyń 277 faktisi anyqtaldy

NUR-SULTAN. QazAqparat - Atyraýdaǵy sábı óliminen keıin respýblıka boıynsha derekter men medıtsınalyq kartalarǵa jappaı aýdıt júrgizililgen. Bul týraly QR Densaýlyq saqtaý mınıstri Eljan Birtanov aıtty, dep habarlaıdy QazAqparat tilshisi.

«Densaýlyq saqtaý - elimizdiń negizgi basymdyqtarynyń biri. Qarqyndy jumys pen keshendi tásilderdiń arqasynda jalpy sońǵy bes jylda ana, týberkýlezden bolatyn ólimniń, qan aınalym júıesi aýrýynan bolatyn, onkologııa jáne jaraqattan bolatyn ólimniń tómendegeni baıqalady. Alaıda uzaq merzimdi kezeńde osy jyldyń 8 aıynyń derekteri boıynsha jalpy ólimniń jáne náreste óliminiń ósýinde bolmashy aýytqýlar baıqalady», - dedi mınıstr Parlament Senatynda.

Eljan Birtanovtyń aıtýynsha, ólim sebepteri boıynsha júıeli sharalar tsıfrlandyrý men statıstıkalyq derekterdiń sapasyn jaqsartý arqyly belsendi túrde júrgizilýde.

«Biz Atyraý oblysynda barlyq týǵannan keıin shetinep ketken nárestelerdiń shyny preparattarynan alynǵan obektıvti derekter men medıtsınalyq kartalardyń aýdıtinen keıin el boıynsha jappaı aýdıt júrgizdik. Taldaý nátıjesinde esepke alynbaǵan erte neonataldyq ólim-jitimniń (...) 277 náreste ólimin jasyryp qalý faktilerin anyqtadyq. Osyǵan baılanysty 2018 jyly náreste óliminiń kórsetkishine túzetý júrgizildi. Burynǵy 1000 tiri týǵan náreste boıynsha ólim-jitim kórsetkishi 8,03-ten 8,7-ge ózgergen», - dedi ol.

Aıta ketsek, Qazaqstan Prezıdenti Qasym-Jomart Toqaevtyń halyqqa Joldaýy aıasynda Parlament Senatynda densaýlyq saqtaý salasyndaǵy mindetter týraly Úkimet saǵaty ótip jatyr.

Eske salsaq, Sybaılas jemqorlyqqa qarsy qyzmet jańa týǵan sábıdiń ólimine, sondaı-aq, jemqorlyq qylmystar boıynsha kúdikti Atyraý oblystyq perzenthanasynyń bas dárigerine qatysty istiń mán-jaıyn baıandady.

Atyraý oblysyna QR Densaýlyq saqtaý vıtse-mınıstri bastaǵan respýblıkalyq densaýlyq saqtaý uıymdarynyń mamandary keldi. Olar oblystyq perınataldyq ortalyqtyń dárigerlerine kómek kórsetedi.