Eljan Birtanov medıtsınalyq oqý oryndarynyń brendin qalyptastyrýdy usyndy
Onyń aıtýynsha, jumys berýshi birinshi kezekte mamannyń dıplomyna basa nazar aýdarady.
«Eńbek naryǵyndaǵy básekelestik JOO abyroıyna tikeleı baılanysty. JOO brendi bolashaqta úlken ról oınaıtyn bolady. Búginde sheteldik stýdentterdiń sany boıysha bizdiń oqý oryndarynyń kórsetkishi joǵary. Keıbirinde 15 paıyzǵa jetedi. Úndistan, Pákistan, Taıaý Shyǵys jáne Afrıkadan stýdentter bar. Syrtqa bilim eksporttaý óte jaqsy», - dedi mınıstr «Strategııalyq seriktestik - medıtsınalyq bilim berýdi jańǵyrtýdyń joly» taqyrybyndaǵy konferentsııada.
Vedomstvo basshysy atap ótkendeı, sheteldik stýdentterdi oqytý úlken jaýapkershilik, óıtkeni stýdentterdiń jumysynan Qazaqstandaǵy medıtsınalyq kómek deńgeıi kórinetin bolady.
«Búginde Úkimet JOO-larǵa barynsha derbestik berýge tyrysady. Memleket oqý ornyn qurady, ınvestıtsııa salady. Biraq basqarý derbes bolýy tıis. Barlyq JOO-lardyń mıssııasy bir - ol bilim berý sapasyn jaqsartý. Al sol oqý oryndary bir-birinen nemen erekshelenedi? Ókinishke qaraı, kóp jaǵdaıda ornalasý jerine baılanysty ǵana», - dedi ol.
Mınıstr medıtsınalyq JOO-larǵa sheteldik ozyq ýnıversıtettermen baılanysty nyǵaıtý kerektigin de atap ótti.
«QR Úkimeti Dúnıejúzilik bankten qaryz aldy. Zaımnyń 35 paıyzy, ıaǵnı 80 mln dollary otandyq medıtsınalyq JOO-lardyń strategııalyq seriktestigin qoldaýǵa baǵyttalady. Shetelden kelgen mamandar bizben birge qoıan-qoltyq jumys jasaýy kerek. Sol úshin aqsha bólinedi», - dep qorytyndylady E.Birtanov.