Eljan Birtanov: Medıtsınalyq kadrlar tapshy eldi mekenderge 6300 jas maman jiberiledi

NUR-SULTAN. QazAqparat - Medıtsınalyq kadrlar tapshy eldi mekenderge, ásirese aýyldarǵa aldaǵy ýaqytta 6300 jas maman jiberiledi. Bul týraly Úkimettiń baspasóz ortalyǵynda Densaýlyq saqtaý mınıstri Eljan Birtanov málim etti, dep habarlaıdy QazAqparat tilshisi.

«Eń basty úlken másele - kadrlardyń jetispeýshiligi. Shynynda da, medıtsınalyq qyzmet sapasynyń tómendeýine kóp jaǵdaıda medıtsınalyq qyzmetkerlerdiń jetispeýshiligi sebep bolyp jatady. Keıbir eldi mekenderde, ásirese aýyldarda ýchaskelik dárigerler aýyr - eki ese júktememen jumys júrgizýde. Bunyń arty álbette, medıtsınalyq qyzmet sapasynyń tómendeýine alyp keledi. Sol sebepti, bul rette qandaı máseleler qolǵa alynady? Eń aldymen, osy jyldan bastap 10 JOO men ǵylymı-zertteý ınstıtýttarynan 6300 medıtsına qyzmetkeri oqýyn bitirip shyǵady. Búgingi tańda jańa zańnamaǵa sáıkes, olar naqty medıtsınalyq uıymdarǵa jiberiledi. Jas mamandarǵa úsh jyldyq mindetti eńbek júktelip otyrǵanyn aıta ketý kerek. Eń aldymen, bul rette aýyldy jerlerdegi medıtsınalyq uıymdardyń qajettiligine mán beremiz», - deıdi Eljan Birtanov Úkimettiń baspasóz ortalyǵynda.

Mınıstr óz sózinde kadr máselesi boıynsha jergilikti atqarýshy organdarmen tıisti jumystar júrgizilgenin tilge tıek etti.

«Memleket tarapynan kórsetiletin qoldaý sharalaryna taldaý jumystary júrgizildi. Túlekterdi belgili bir aýylǵa bekitý jumystary aıasynda mindetti túrde memleket tarapynan qoldaý kórsetiletin bolady», - deıdi ol.

Aıta ketsek, Úkimettiń baspasóz ortalyǵynda Elbasynyń «Áleýmettik qamqorlyq» jańa áleýmettik sharalarynyń negizgi baǵyttaryn túsindirý boıynsha óńirlerge jasaǵan jumys saparlary qorytyndylandy.