Eljan Birtanov Qytaıǵa baryp kelgen qazaqstandyqtarǵa úndeý joldady
«Qytaıǵa baryp kelgen Qazaqstan azamattaryna bir nárseni aıtqym keledi. Olarmen baılanysqa shyǵý múmkin bolmaı jatady. Sońǵy 14 kún ishinde QHR-dan jáne oǵan kórshiles elderden kelgen barlyq azamattar turǵylyqty mekenjaıy boıynsha emhanaǵa kelýi kerek jáne óz dárigerine tirkeýge turyp, densaýlyǵyn teksertýi qajet», - dedi mınıstr Úkimet úıinde ótken baspasóz máslıhatynda.
«Bul óz qaýipsizdikterińiz úshin kerek. Bizdiń medıtsınalyq mamandar baqylaý júrgizip, densaýlyǵyńyz nasharlaǵan jaǵdaıda shara qabyldasa, ózińiz ben otbasyńyzdyń ózge múshelerine tónetin qaýip seıiledi», - dedi Eljan Birtanov.
Buǵan deıin mınıstr Ýhannan jetkizilgen qazaqstandyq stýdentterdiń arnaıy korpýsta tekseriletinin aıtqan edi.
Sońǵy málimetterge sáıkes, qazir Qytaı aýmaǵynda 1300 qazaqstandyq bar. Onyń 635-i Haınan provıntsııasynda júr, 204 adam - elshilik pen konsýldyqtyń, kompanııalardyń qyzmetkerleri, olardyń otbasy jáne 445 qazaqstandyq jalpy Qytaı aýmaǵynda júr.
Qazirgi ýaqytta QHR aýmaǵynan 25 858 adam keldi. Onyń arasynda qyzýy kóterilip kelgen 23 jolaýshynyń tórteýi JRVI kúdigimen aýrýhanaǵa jatqyzyldy.