Eljan Birtanov Qytaıdan kelgen dárigerlermen onlaın kezdesý ótkizdi
Densaýlyq saqtaý mınıstrligi shetelden kelgen medıtsınalyq qyzmetkerler jaıly osyndaı ustanymda ekenin jarııa etti, dep habarlaıdy QazAqparat tilshisi.
Qazaqstan Respýblıkasynyń Densaýlyq saqtaý mınıstri Eljan Birtanov Memleket basshysynyń kelisimi aıasynda Nur-Sultanǵa kelgen qytaılyq dárigerlermen onlaın-kezdesý ótkizdi. Bul týraly mınıstrliktińFacebook paraqshasynan málim boldy.
«Mınıstr Qazaqstan Úkimetiniń atynan qytaı dárigerleriniń delegatsııasyn qarsy alyp, Qytaı úkimetiniń COVID-19-ǵa qarsy is-qımylda kórsetken qoldaýy úshin alǵysyn bildirdi. Eljan Birtanov búgin Qazaqstan Prezıdentiniń tóraǵalyǵymen tótenshe jaǵdaıdy qamtamasyz etý jónindegi memlekettik komıssııanyń otyrysy ótip, onda Memleket basshysy tótenshe jaǵdaıdy sáýir aıynyń sońyna deıin uzartý týraly sheshim qabyldaǵanyn jetkizdi», - dep habarlaıdy mınıstrlikten.
Sonymen qatar Eljan Birtanov onlaın rejımde ótken kezdesýde qazirgi ýaqytta elimizde koronavırýs indeti sharyqtaý shegine taıap qalǵanyn da aıtty.
«Nur-Sultan men Almatyda qabyldanǵan shekteý sharalary aýrýdyń ósim qarqyny tómendegenin kórsetip otyr. Alaıda basqa óńirlerdegi jaǵdaı áli de turaqsyz. Bul ahýal búkil elde qatań karantındik sharalardy engizýdi talap etedi. Bizge koronavırýstyń taralý deńgeıin turaqty túrde tómendetip, shekteý sharalaryn toqsary deńgeıden sary deńgeıge deıin álsiretý kerek», - dedi mınıstr.
Eljan Birtanov aldaǵy 2-3 aı eldegi epıdemıologııalyq jaǵdaı úshin mańyzdy ekenin atap ótip, Qytaıdan kelgen sarapshylardyń bul saparyn Memleket basshysynyń Qazaqstandaǵy koronavırýs ınfektsııasymen kúreste ýaqytyly jáne naqty sheshimi ekenin jetkizdi.⠀
Kezdesý barysynda Densaýlyq saqtaý vıtse-mınıstri Lázzat Aqtaeva jáne Ulttyq densaýlyq saqtaý ortalyǵynyń dırektory Damır Kópjasarov, sondaı-aq medıtsınalyq oqý oryndarynyń rektorlary men qoǵamdyq densaýlyq saqtaý departamentteriniń basshylary qytaılyq áriptesterine Qazaqstandaǵy COVID-19 aýrýyna baılanysty epıdemıologııalyq jaǵdaı týraly baıan etti.
Óz kezeginde delegatsııany bastap kelgen Іle-Qazaq avtonomııalyq okrýgi gýbernatorynyń orynbasary Ersin Tursynbaı Qytaı úkimeti qabyldaǵan sharalardyń arqasynda elde indet azaıyp bara jatqanyn habardar etti. Ersin Tursynbaı Qazaqstannyń Jibek jolyn ilgeriletýdegi basty rólin erekshe tilge tıek etti.
Onyń aıtýynsha, osy faktorlar Qytaı úkimetiniń Qazaqstan halqyna qoldaý kórsetý úshin joǵary dárejeli medıtsınalyq sarapshylar tobyn jiberý sheshimine oń áserin tıgizgen.
«Koronavırýsqa qarsy kúreste Qytaıdyń zor tájirıbesi bar. Ol tájirıbe júrgizilgen kóptegen zertteý men naýqastardy emdeý nátıjesinde alynǵan», - dedi delegatsııa basshysy.
Kezdesýge Qytaıdyń Qazaqstan Respýblıkasyndaǵy Tótenshe jáne Ókiletti Elshisi Chjan Sıao myrza da qatysty.
Ol Qazaqstan Úkimetine delegatsııany áýejaıda jaqsy qarsy alǵany úshin alǵysyn aıtty. Elshi Qazaqstan indet kezeńinde qytaı halqyn alǵashqylardyń biri bolyp qoldaǵanyn eske saldy. Bul eki el arasyndaǵy strategııalyq seriktestik, ózara senim jáne tatý kórshilik qarym-qatynas rýhynyń aıqyn kórinisi ekenin jetkizdi.
Kezdesý sońynda taraptar jemisti jumys júrgizý týraly kelisip, ózara qurmet bildirdi.⠀