Eljan Birtanov koronavırýstyń aldyn alýǵa qandaı sharalar qabyldanǵanyn aıtty
«Qazirgi tańda Qytaı Halyq Respýblıkasynyń barlyq ólkesinde jańa koronavırýstyq pnevmonııamen naýqas 40 myńnan astam adam tirkeldi, onyń ishinde 1016-sy kóz jumdy jáne 3996-sy emdelip shyqty. Hýbeı ólkesiniń 16 qalasynda karantın engizildi. Álemniń 27 elinde 448 adamda koronavırýstyq ınfektsııa rastaldy. Bul rette, Qytaıdaǵy syrqattyń taralý qarqyny 31 qańtar men 9 aqpan aralyǵynda 22-den 6,1 paıyzǵa deıin tómendedi», - dedi ol.
Mınıstr basqa elderde koronavırýstyq ınfektsııanyń taralý qarqyny 3,8-27 paıyz aralyǵynda ekendigin atap ótti. Sonymen qatar ol Qytaıdaǵy epıdemıologııalyq jaǵdaıdyń órshýine baılanysty QR Densaýlyq saqtaý mınıstrligi indettiń elimizge taralýynyń aldyn alý úshin qabyldaǵan sharalaryna toqtaldy.
«2020 jyldyń 6 qańtarynda QR Bas memlekettik sanıtarlyq dárigerdiń Qazaqstan-qytaı aralyǵyndaǵy memlekettik shekaranyń barlyq ótkizý pýnktterinde sanıtarlyq-epıdemıologııalyq baqylaýdy kúsheıtý týraly qaýlysy jarııalandy. Qytaıdan kelgen barlyq adamdardy turǵylyqty jeri boıynsha monıtorıngileý uıymdastyryldy. Medıtsınalyq uıymdardyń naýqas jáne aýrýǵa kúdikti adamdardy qabyldaýǵa daıyndyq retinde qosymsha 4,5 myń tósek orny uıymdastyryldy. Jeke qorǵanysh quraldarynyń, profılaktıkalyq jáne emdeý zattarynyń qajetti qory quryldy», - dedi Eljan Birtanov.