Eljan Birtanov koronavırýstan emdelip jatqan patsıenttermen kezdesti

ALMATY. QazAqparat - QR Densaýlyq saqtaý mınıstri Eljan Birtanov Almaty qalasyna jumys sapary aıasynda jańadan salynǵan juqpaly aýrýlar aýrýhanasyna baryp, koronavırýs ınfektsııasynan emdelip jatqan patsıentterdiń jaǵdaıyn bildi, dep habarlaıdy QazAqparat tilshisi.

Vedomstvo málimetinshe, QR Densaýlyq saqtaý mınıstri Eljan Birtanov modýldik keshende ornalasqan «I.S. Jekenova atyndaǵy qalalyq klınıkalyq juqpaly aýrýlar aýrýhanasy» fılıalynda eńbek etip jatqan dárigerlermen júzdesti jáne naýqastardyń da jaǵdaıyn surady.

«Gospıtalda jaqsy jaǵdaı jasalǵan, emdelýdemiz. Medıtsına qyzmetkerleri óte muqııat, árdaıym sózimizdi jerge tastamaıdy jáne qıyn kezde úlken qoldaý kórsetti», - dedi Anastasııa Zaharova (aty-jóni ózgertildi).

Mınıstr de naýqastyń tez saýyǵyp ketýin tiledi.

Atalǵan juqpaly aýrýlar aýrýhanasynda 280 tósek-oryn, 6 klınıkalyq bólimshe, 28 tósektik reanımatsııa bólimshesi bar.

Medıtsınalyq jabdyqtar: rentgen júıesi, kompıýterlik tomografııa, ýltradybystyq dıagnostıka apparattary, endoskopııalyq jabdyqtar, ókpeni jasandy jeldetý apparattary, monıtorlar, perfýzorlar jáne taǵy basqalary ornatylǵan ári jumys isteıdi.

Eljan Birtanov, ásirese aldyńǵy shepte júrgen dárigerlerge erekshe kóńil bóldi. Mınıstr áriptesterine qıyn da, jaýapty sátte kórsetken adal qyzmetteri úshin alǵys aıtty. Sondaı-aq, ol medıtsına qyzmetkerlerine arnalǵan qosymsha tólemderge qatysty sóz qozǵady.

«Maǵan jalaqydan basqa áleýmettik tólemder bólindi «- dedi bas medbıke Saırash Dıkımova mınıstrmen áńgime barysynda.