Eljan Birtanov koronavırýs órshı túsken óńirlerdi atady
«Sońǵy 2 aptanyń jaǵdaıyn qarasaq, shynymen de ósim deńgeıi baıqalýda. Ótken 2 aptanyń ishinde kúndelikti ósim deńgeıi 5 paıyzdan aspady. Soǵan qaramastan, keıbir óńirlerde koronavırýspen tirkelgen naýqastardyń sany artty. Mysaly, Atyraý, Qaraǵandy, Almaty, Jambyl, Qostanaı, Túrkistan, Batys Qazaqstan oblystary men Shymkent qalasynda baıqaldy. Osy óńirlerde koronavırýsty juqtyrýdyń ósimi birinshiden, ókinishke oraı, úlken kásporyndarda tirkelip otyr», - dedi mınıstr Ortalyq kommýnıkatsııalar qyzmetindegi brıfıng barysynda.
Mysaly, onyń dereginshe, Atyraý oblysynda Teńiz kenishinde - 1 063 naýqas, Qaraǵandy oblysynda - 358 naýqas, al Shymkent qalasyndaǵy «PetroQazaqstan» uıymynda - 219, Nur-Sultan men Túrkistan qalasyndaǵy qurylys kásiporyndarynda 80-nen astam naýqas tirkelgen.
«Sonymen qatar Almaty men Jambyl oblystaryndaǵy áskerı uıymdardyń ishinde de kóp naýqas tirkeldi. Sebebi de belgili. Karantın kezinde biz, jalpy halyq úıde otyrǵan kezde keıbir jumysshylar, mysaly medıtsına qyzmetkerleri, áskerı adamdar jáne jumysy toqtatylmaıtyn kásiporyndardyń mamandary jumys istedi. Infektsııanyń taralýy táýekeli joǵary boldy jáne osyndaı jaǵdaı tirkelip otyr», - dedi Eljan Birtanov.