Eljan Birtanov koronavırýs ınfektsııasyna testten ótedi - QR DSM

NUR-SULTAN. QazAqparat - QR Densaýlyq saqtaý mınıstrliginiń resmı ókili Dıas Ahmetshárip burynǵy vıtse-mınıstr Kamaljan Nadyrovtan ózge qyzmetkerlerge KVI juǵýy múmkin ba degen suraqqa jaýap berdi, dep habarlaıdy QazAqparat.

«Ózderińizge belgili, 30 naýryzdan bastap, Densaýlyq saqtaý mınıstrligi tolyqtaı qashyqtan jumysqa kóshken bolatyn. Sondyqtan, mınıstrlik ishinde dert juqtyrý qaýpi mınımaldy, qyzmetkerlerdiń 90 paıyzy úıden jumys istep otyr. Jumysta mınıstrdiń ózi (Eljan Birtanov - red.) jáne 3-4 adam ǵana qaldy. Olardyń da árqaısysy jeke kabınette bolǵandyqtan, juqtyrý qaýpi az degen oıdamyz. Degenmen, búgin mınıstr Eljan Amantaev koronavırýs ınfektsııasyna test tapsyrady. Nátıjesi shyqqan soń, árıne habarlaımyz», - dedi Dıas Ahmetshárip QazAqparat tilshisine bergen jaýabynda.

Onyń aıtýynsha, K. Nadyrovpen jaqyn jáne yqtımal baılanysta bolǵandar anyqtalyp jatyr. Epıdemıologııalyq tekserý bastaldy.

«Sońǵy kúnderi Kamaljan Nadyrov mınıstr tapsyrmasymen Almaty oblysynda boldy. Almaty qalasynda emhanadan aýrý oshaǵy shyǵyp, dárigerlerdiń arasynda túsinispeýshilik týǵanda da, K. Nadyrov barǵan edi. Árıne, qorǵanys kıimin kıip, barlyq talaptardy saqtady. Degenmen, aýrýdyń kimnen, qaı jerden juqqanyn anyqtaýymyz qajet. Ol kisi qazir qaı kúni qaıda bolǵanyn, kimmen kezdeskenin tizbektep jazyp otyr. Baılanysta bolǵan barlyq adamdarǵa PTR arqyly dıagnostıka jasalady», - dedi resmı ókil.

Aıta ketsek, Densaýlyq saqtaý vıtse-mınıstri bolǵan Kamaljan Nadyrov koronavırýs ınfektsııasyn juqtyryp, aýrýhanaǵa jatqyzyldy. Ol Almaty qalasy Densaýlyq saqtaý basqarmasynyń basshysy qyzmetine kirisýi kerek edi.

Buǵan deıin mınıstrlik ókili D. Ahmetshárip K. Nadyrovtyń qandaı halde jatqanyn aıtyp bergen edi.