Eljan Birtanov: Koronavırýs ınfektsııasy boıynsha jaǵdaı Úkimettiń baqylaýynda

NUR-SULTAN. QazAqparat – Densaýlyq saqtaý mınıstri Eljan Birtanov Qazaqstanda koronavırýs ınfektsııasyn juqtyrý kórsetkishi 3-5 paıyz deńgeıinde ekenin málim etti, dep habarlaıdy QazAqparat tilshisi.

«Ókinishke qaraı, koronavırýs pandemııasy áli de jalǵasýda. Qazaqstanda da koronavırýs ınfektsııasynyń taralýy toqtaǵan joq. Alaıda, ınfektsııanyń taralý qarqyny men odan kóz jumǵandardyń sanyna nazar aýdarsaq, ár eldiń kórsetkishi ártúrli. Qazirgi tańda bizdiń elde koronavırýs juqtyrǵan 10 myńnan astam tirkeldi. Áıtse de ósim qarqyny kúnine 3-5 paıyzdy kórsetip otyr. Kórsetkishteri joǵary aımaqtar da bar. Degenmen keıbir aımaqta jaǵdaı qalypty», - dedi Eljan Birtanov Densaýlyq saqtaý mınıstrliginiń Facebook paraqshasynda «Habar 24» arnasy tilshisiniń suraǵyna jaýap bere otyryp.

Mınıstrdiń aıtýynsha, Qazaqstanda koronavırýs ınfektsııasy boıynsha jaǵdaı baqylaýda.

«Keıingi aıda qarqynnyń 5 paıyzdan aspaǵanyn baıqadyq. Bul degenimiz koronavırýs ınfektsııasy boıynsha jaǵdaı Úkimettiń baqylaýynda ekenin bildiredi», - dedi ol.