Eljan Birtanov eshkimnen jasyrynyp júrgen joq - Dáýren Abaev
«Densaýlyq saqtaý salasyna qatysty sońǵy qaıǵyly jaǵdaı – ártúrli, bir-birimen baılanysy joq oqıǵalar (Atyraýdaǵy sábı ólimi, Almatydaǵy dárigerlerdiń tutqyndalýy men jas dárigerlerdiń vıdeoúndeýi). Ár jaǵdaı boıynsha jeke jumys júrgizý kerek. Meniń oıymsha, osy rette meniń áriptesim Eljan Birtanov qastyq oılaǵandar úshin qolaıly nysanaǵa aınalǵan sekildi. Eshteńe bitirmegen adamdy ǵana eshkim synamaıdy. Al Densaýlyq saqtaý mınıstrligi sońǵy jyldary qyrýar jumys júrgizdi. Salada júıeli ózgerister bolyp jatyr. Mundaı jaǵdaıda ashyqtyq pen sapany baqylaý isine paıda tappaıtyn kóńili tolmaıtyndar qashan da tabylady», - dedi Dáýren Abaev «Ashyq dıalog» baǵdarlamasynda.
Mınıstr atalmysh vıdeony kórgenin aıtty.
«Mınıstrliktiń málimdemesine alyp-qosarym joq. Ereje men zań bar. Oǵan baǵyný kerek. Memleket bolashaq dárigerler úshin qarajat bóldi. Al olar oqý bitkennen keıin birden jibergen jumysta isteýge mindetteldi. Olardyń bári de tıisti qujatqa qol qoıǵan. Bul mamandardyń bárin kadrlar defıtsıti anyq seziletin aýyldar, aýdan ortalyqtary, aýrýhanalar kútip tur. Aınalyp kelgende bul - aýqymdy tájirıbe. Eshqandaı rezıdentýra atalǵan mindettemelerden bas tartý jolyna aınala almaıdy. Bul - kelisimniń buzylýy», - dedi ol.
Dáýren Abaev bul jerde másele mınıstrde emes ekenin atap ótti.
«Bul jerde másele mınıstrde emes. Olar kimdi bolsyn ornynan ketirýdi talap ete alady. Alaıda kelisimge qol qoıdyń ba, mindettemege saı jumys isteýge týra keledi. Jalpy, bul máselege qatysty Densaýlyq saqtaý mınıstri eshkimnen jasyrynyp júrgen joq. Synaǵandardyń bárimen kezdesip júr. Dıalogqa daıyn ekenin árdaıym málimdeıdi», - dedi Dáýren Abaev.
