Eljan Birtanov: Eń durysy - maskany ózimiz tigip alý
«Maskaǵa qatysty másele bar. Búgingi tańda maskany tek ózimizdiń eldegi zaýyttar men óndiristerden ǵana ala alamyz. Olardyń kúndelikti shyǵarǵan ónimi bir mıllıonnan aspaıdy. 250-300 myńǵa jýyq medıtsınalyq maska farmatsevtıkalyq zaýyttarda shyǵarylady. Qalǵan maskalardy jeke menshik kompanııalar tigedi. Jalpy alǵanda bir táýlikte bir mıllıon maska óndiriledi. Biraq maskany qoldaný budan eki-úsh ese kóp. Osyǵan baılanysty qytaı óndirýshilerimen kelistik. Biz 5 mln maskany ımporttaý týraly kelisimge qol qoıdyq. Ókinishke qaraı, Qytaıda logıstıka túbegeıli ashylǵan joq. Aldaǵy aptada jetkiziledi dep otyrmyz. Sondaı-aq, «Birgemiz» qory arqyly halyqtyń osal tobyna beriledi. Olar - dertke shaldyqqan, aıaǵy aýyr áıelder nemese balalar sııaqty maskaǵa muqtaj adamdar», - deıdi Birtanov.
Onyń aıtýynsha, maska jetispegen jaǵdaıda negizgi bóligi aýrýhanalarǵa jetkiziledi.
«Eger dárigerlerdi qorǵamasaq, olar aýyryp qalsa - qalǵandaryn emdeıtin eshkim qalmaıdy. Damyǵan memleketter maska, sonyń ishinde dákeden maska tige bastady. Biz budan eshqandaı oǵashtyq kórmeımiz. Bul - ár otbasy, uıym, eldiń sanaly áreketi. Jaǵdaıǵa beıimdelip, ómir súrý kerek. Ótken ǵasyrda qazirgideı qurylǵylar bolmasa da medıtsına budan zorǵy ınfektsııalardy jeńgen. Marliden maskany ońaı tigýge bolady jáne ony zalalsyzdandyrýǵa bolady. Sondyqtan da jalǵyz jol - maskany ózimiz tigý», - deıdi ol.