Eljan Birtanov emhana máselesi qalaı sheshiletinin túsindirdi

ASTANA. QazAqparat - Medıtsınalyq-sanıtarlyq alǵashqy kómektiń qoljetimdiligin arttyrý maqsatynda 2021 jylǵa deıin 600-ge jýyq nysan salynady. Bul týraly Úkimettegi baspasóz máslıhatynda QR Densaýlyq saqtaý mınıstri Eljan Birtanov aıtty, dep habarlaıdy QazAqparat tilshisi.

«Prezıdent alǵashqy medıtsınalyq kómekke qatysty tıisti tapsyrma júktedi, ıaǵnı emhanalardyń qoljetimdigin arttyrý qarastyrylýda. Júrgizilgen esepteýge qaraǵanda, búginde adamnyń ýchaskelik dárigerine jetýine ortasha alǵanda 40 mınýt ýaqyt ketedi. Óıtkeni iri emhanalar alys jerde ornalasqan. Bul máseleni sheshý úshin úsh jylda medıtsınalyq-sanıtarlyq alǵashqy kómektiń qoljetimdiligin arttyrý maqsatynda 2021 jylǵa deıin 595 nysandy salý josparlanýda», - dedi mınıstr.

Atap aıtqanda, onyń 577-si aýyldyq eldi mekende jáne 18-i kalalyq jerde qadamdyq qashyqtyqta ornalasatyn bolady. Osylaısha, 2021 jylǵa deıin medıtsınalyq-sanıtarlyq alǵashqy kómektiń shaǵyn nysandary salynyp, ár mekemege keletin ýchaskeniń sanyn 20-dan 10-ǵa deıin qysqarady. Bul aýyldyq eldi mekende turatyn halyqty medıtsınalyq kómekpen tolyqtaı qamtýǵa múmkindik beredi. Osy mekemelerdiń salynýyna bólinetin qarjynyń shamamen 42% memlekettik-jekeshelik áriptestik esebinen bolady.