Eljan Birtanov dárigerlerge jazany jeńildetý bastamasyn túsindirdi
Engizilgeli jatqan ózgeristerdiń negizdiligine qatysty pikirin búgin Parlament Májilisinde depýtat Vasılıı Oleınık bildirdi.
«Medıtsınalyq qyzmetkerlerge qarastyrylǵan jazany jeńildetý qatelikke quqyq berýmen teń bolmaı ma? Bul azamattar arasynda jaǵymsyz rezonans týdyrýy ábden múmkin. Sondaı-aq ózgerister azamattarǵa medıtsınalyq jáne farmatsevtıkalyq qyzmet kórsetý sapasyna áser etpeı me?», - dedi Vasılıı Oleınık zań jobasynyń tanystyrylymynda.
Buǵan jaýap bergen Eljan Birtanov bul ózgerister josparlanbaǵan qatelikterdiń jaǵdaıyn aldyn alý baǵytynda engizilgeli otyrǵanyn atap ótti. Naqtyraq aıtqanda, qazirgi zańnamadan «standarttardy saqtamaý» pýnkti alynyp tastalmaq. Mınıstr óz sózinde keıbir jaǵdaılarda ol pýnkten dárigerlerdiń aýytqýyna týra keletinin aıtty. Máselen, ótken jyly ǵana osyǵan baılanysty úsh júzge tarta qylmystyq is qozǵalǵan.
«Shyntýaıtyna kelgende standarttardy saqtamaý pýnkti nemquraılylyqqa nemese qyzmetin tıisti deńgeıde oryndamaýǵa jatpaıdy. Standarttar ǵylymı zertteýlerdiń negizinde bekitiletindikten, analızdiń nátıjesinde emdelgen naýqastardyń sany myńnan asatynyn baıqaımyz. Olardyń barlyǵy da medıtsınalyq kómektiń ortasha algorıtmin kórsetedi», - deıdi mınıstr.
Sonymen birge, zań jobasynda abaısyzda ortasha deńgeıde zııan keltirgeni úshin belgili bir laýazymdy ıelený, kásibı mamandyǵymen aınalysý quqyǵynan aıyrý jazasyn alyp tastaý qarastyrylýda. Mınıstrdiń aıtýynsha, bul óte qatań jaza.
«Adamǵa asa aýyr emes zııan úshin kásibı mamandyǵymen aınalysý, qoǵamnyń áleýmettik tirshiligine aralasý, sondaı-aq ary qaraı ósý múmkindiginen aıyrýy múmkin. Biz dárigerlerden jaýapkershilikti alyp tastaý kerek dep otyrǵan joqpyz. Jaýapkershilik bolýy kerek. Biraq, biz bul rette halyqaralyq standarttardy da attap ketpeýimiz kerek», - dedi Eljan Birtanov.