Eljan Birtanov dárigerlerge úndeý jasady: Sizder búgingi kúnniń batyrysyzdar!
«Men búgin táýlik boıy jumysta júrgen, qańtar aıynan beri demalys kórmegen barlyq deńgeıdegi medıtsınalyq qyzmetkerlerge, dárigerler men medbıkelerge, sanıtarlar men medıtsınalyq uıymdardyń basshylaryna, sanıtarlyq qyzmettegilerge, ýnıversıtetter men ǵylymı ortalyqtardyń jetekshilerine úndeý tastaǵym keledi. Kóbińizdiń qaljyrap sharshaǵandaryńyzdy, emotsıonaldyq turǵyda ábden qınalǵandaryńyzdy túsinemin. Kóbińiz úıge baryp, balalaryńyzdy qushaqtaı almaı otyrsyzdar. Úreılenip te júrsizder. Aralaryńyzda juqtyryp alǵandar da bar», - dep jazdy Eljan Birtanov facebook paraqshasynda .
Mınıstr medıtsınalyq qyzmetkerler qanshama qınalsa da adamdardy qutqarý úshin tańerteń turyp, jumysqa baratynyn eske saldy.
«Aqsha nemese abyroı úshin emes, jumysyńyz sondaı bolǵannan keıin adamdardyń ómirine arasha túsip júrsizder. Men sizdermen maqtanamyn!» - dedi mınıstr.
Eljan Birtanov medıtsına salasynyń qyzmetkerlerimen sózimen ǵana emes isimen de kómektesip júrgen jandarǵa, qarttarǵa dári-dármek pen tamaq aparyp júrgen, maska tigip, kerekti júkter úshin ushaq aqshasyn tólep júrgen, ınternet arqyly kontsert bergen, tipti jaı ǵana úıinde karantınge otyrǵan adamdarǵa alǵysyn aıtty.
«Ókinishke qaraı, qazir qaıdaǵy bir «sarapshylar», karantınde ishi pysqan «mamandar» men dıvan synshylary paıda boldy. Olar áleýmettik jeliler men jańalyqtar legin «qoqys» aqparattarmen, túsiniksiz baǵalarmen, orynsyz boljamdarmen jáne oısyz keńestermen toltyryp tastady. Sabyrǵa kelip, olarǵa mán bermeýlerińizdi, ózderińizdi kásibı turǵyda ustaýlaryńyzdy suraımyn. Ondaı adamdardyń sózderin júrekke jaqyn qabyldamańyzdar», - deıdi ol.
Mınıstrdiń aıtýyna qazir búkil el eń kúrdeli kezeńge aıaq basqan.
«Qazir bizden shydamdylyq pen kásibı áreket qana talap etiledi. Búgingi kúni biz jumysqa ǵana bar nazarymyzdy aýdarýymyz kerek. Eski ókpeni byqsytyp, kıkiljiń shyǵaryp jatatyn ýaqyt emes. Epıdemııanyń beti qaıtqannan keıin máseleniń bárin sheshermiz. Ol úshin barymyzdy salamyz. Ýaqyt óter – epıdemııa keter. Búgingi kún týraly kitap ta jazylyp, fılmder túsiriler... Kóbi osy kúndi umyt qaldyrar. Biraq dál osyndaı qıyn kezeńde kúndiz-túni, aptalap, aılap aýrýhanada SІZDERDІŃ bolǵandaryńyzdy este saqtańyzdar. SІZDER – búgingi kúnniń batyrysyzdar! Bul vırýsty jeńerimizge senemin. Ony siz ben bizdiń kásibıligimiz, ǵylymymyz ben tártibimiz jeńedi. Ózderińizdi saqtańyzdar», - dep túıdi Eljan Birtanov.