Eljan Birtanov dárigerlerge alǵys aıtty
NUR-SULTAN. QazAqparat – Densaýlyq saqtaý mınıstri Eljan Birtanov elimizdegi dárigerlerge, onyń ishinde sanıtarlyq-epıdemıologııalyq qyzmettine alǵys aıtty, dep habarlaıdy QazAqparat.
«Elimizdegi sanıtarlyq-epıdemıologııalyq qyzmettiń barlyq qyzmetkerine, sanıtarlyq zerthanalardyń, sondaı-aq, jedel járdem dárigerlerine eren eńbegi úshin alǵys aıtqym keledi. Koronavırýs juqtyrýy múmkin degen kúdikpen karantınge jabylǵan azamattarǵa medıtsınalyq kómek kórsetken emhana, aýrýhana mamandaryna da kóp raqmet!» - dep jazdy mınıstr facebook paraqshasynda .
Eljan Birtanov dárigerler eshbir qıyndyqqa, qaýip-qaterge qaramastan, kásibı boryshyn abyroımen atqaryp kele jatqanyn aıtyp ótti.
«Sizderdiń arqalaryńyzda jáne sizderdiń mamandyq aldyndaǵy adaldyq, otansúıgishtik qasıetterińizdiń arqasynda Qazaqstan medıtsınasy kún saıyn órship kele jatqan jahandyq indetti jeńe alatynyna senimdimin!» - deıdi ol.
