Eljan Birtanov dári-dármek sapasyn tekserý jaıynda aıtty
«Eger adamnyń nemese medıtsına qyzmetkeriniń dári-dármek sapasyna kúdigi bolsa, onda ol úshin arnaıy memlekettik organ – Taýarlar men qyzmetterdiń sapasy men qaýipsizdigin baqylaý komıteti bar. Birikken komıtettiń qurylymyna Farmatsııalyq baqylaý komıteti, sonymen qatar sanıtarlyq saraptama kirip otyr. Osynaý memlekettik organ dári-dármektiń sapasy men qaýipsizdigine jaýap beredi. Tirkelgen shaǵym negizinde «sary karta» dep atalatyn janama áserler bolsa, onda zańnamada bekitilgen standartty protsedýralar boıynsha atalǵan dáriler nemese medıtsınalyq maqsattaǵy buıymdar alynady. Sodan keıin oǵan tekserý júrgiziledi», - dedi mınıstr elordadaǵy Zerthanalyq synaqtar ortalyǵynyń ashylý aıasynda BAQ ókilderine bergen suhbatynda.
Eljan Birtanovtyń atap ótýinshe, dári-dármektiń barlyq túrlerin tekserý synaq zerthanasynda júzege asyrylady.
«Eger dári sapasy saı bolmasa, onda soǵan oraı dári-dármek aınalymynan alynyp, naryqqa jiberilmeıdi. Alaqol kásipkerge qatysty da tıisti sharalar, onyń ishinde ákimshilik-qylmystyq jaýapkershilik kózdelgen. Bizdiń mindetimiz – barlyq qazaqstandyqqa dári-dármektiń qaýipsizdigin qamtamasyz etý úshin búkil jaǵdaı bar ekendigin kórsetý».
Onyń naqtylaı túsýinshe, barlyq dári-dármek mindetti tártippin baqylanýy tıis. Alaıda Qazaqstannyń qoldanystaǵy zańnamasyna sáıkes dárihanalardy tekserýge bolady.
«Mundaı jaǵdaıda, azamattardan nemese dárigerlerden túsetin shaǵymdar jylyna 2-3 ret kezdesedi. Biz munyń barlyǵyn, ıaǵnı kontrabandalyq dári-dármektiń bar ekendigin jaqsy túsinemiz. Biz úshin shaǵymnyń túskeni mańyzdy. Dárihanalardy aralap, tekserýge quqyǵymyz joq. Bul – zańǵa qaıshy. Bizge jospardan tys, kenetten dárihanalardy tekserýge tyıym salatyn Kásipkerlik kodeks bar. Eger halyqtan jáne medıtsına qyzmetkerlerinen shaǵym bolsa, onda tekseremiz. Degenmen mundaı jaǵdaı sırek kezdesedi», - dedi Eljan Birtanov.