Eljan Birtanov Astana deklaratsııasynyń qalaı qabyldanǵanyn aıtyp berdi
«Búgin - Qazaqstandaǵy densaýlyq saqtaý salasy úshin óte erekshe kún. Ózderińizge málim, Astanada úsh kúndik alǵashqy medıtsınalyq-sanıtarlyq kómekke arnalǵan konferentsııa ótip jatyr. Bul jıyndy Dúnıejúzilik densaýlyq saqtaý uıymy jáne BUU-nyń Balalar qory, QR Úkimeti birlese uıymdastyrǵan. Búgin estip otyrǵandaryńyzdaı, osydan 40 jyl buryn búkil álemniń dárigerleri men medıtsına salasynyń mamandary Almatyda jınalyp, halyqaralyq Almaty deklaratsııasyn qabyldaǵan. Búgin dúnıe júziniń ǵalymdary men saıasatkerleri aıtyp otyrǵandaı, Almaty deklaratsııasynyń mańyzy óte joǵary. Áli de densaýlyq saqtaý salasy damyp ketkenimen, bul deklaratsııanyń mańyzy óte erekshe», - deıdi Eljan Birtanov.
Mınıstrdiń aıtýynsha, bul deklaratsııa árbir adamnyń densaýlyq saqtaýda quqyǵyn qorǵaıdy.
«Osy deklaratsııany kóptegen memleketter óziniń densaýlyq saqtaý strategııalaryn qoldaý úshin paıdalandy. Olardyń ishinde ózimizdiń Qazaqstan da bar. Qazirgi kúni de elimizdiń densaýlyq saqtaý salasyndaǵy jetistikteri osy mańyzdy deklaratsııany qabyldaý negizine baılanysty», - deıdi ol.
Eljan Birtanov óz sózinde atap ótkendeı, Almaty deklaratsııasy qabyldanǵaly beri Qazaqstanda ǵana emes, álemde de kóptegen ózgerister oryn alyp otyr. Onyń aıtýynsha, qazir álemde epıdemıologııalyq aýrýlardyń túrleri ózgerdi. Qazirgi kúni eń mańyzdy aýrýlar ınfektsııalyq emes, sozylmaly aýrýlar bolyp otyr.
«Al ekinshiden, saıası jáne áleýmettik faktorlar da óziniń áserin tıgizip jatyr. Sonymen qatar, aglomeratsııa, mıgratsııa, ǵylymı-tehnıkalyq protses óziniń yqpalyn tıgizbeı jatqan joq. Biz osy máseleni kóterip, dúnıe júziniń medıtsına salasynyń, alǵashqy medıtsınalyq kómektiń kelesheginiń damý baǵyttaryn aıqyndaý úshin biz ótken jyly Jeneva qalasyndaǵy Dúnıejúzilik densaýlyq assambleıasynda bastama kóterdik. Almaty deklaratsııasy negizinde jańa medıtsınalyq-sanıtarlyq alǵashqy kómekti damytý deklaratsııasyn qabyldaýdy usyndyq. Áriptesterim, DDSU basshysy, ıÝNISEF ókilderi bizdiń oıymyzdy qoldap, barlyq mamandar qosylyp, jańa Astana deklaratsııasyn ázirledik. Bul deklaratsııany kóptegen sarapshylar, mamandar talqylady. Myńnan astam pikir boldy. Sonymen búkil memleketter sońǵy mátinin qabyldap, búgin Astana deklaratsııasynyń qabyldanǵanyn jarııaladyq», - deıdi Eljan Birtanov.
Eske sala ketsek, buǵan deıin Dúnıejúzilik densaýlyq saqtaý uıymyna múshe barlyq 197 memleket medıtsınalyq-sanıtarlyq alǵashqy kómek boıynsha Astana deklaratsııasyn bir aýyzdan qabyldaǵanyn habarlaǵan bolatynbyz.
Sondaı-aq, Memleket basshysy Nursultan Nazarbaev Medıtsınalyq-sanıtarlyq alǵashqy kómek boıynsha jańa Astana deklaratsııasyn qabyldaý - búkil álemdegi densaýlyq saqtaý salasy úshin mańyzdy kezeń bolatynyn atap ótken bolatyn.
