Eljan Birtanov Almatyda vırýs juqtyrǵan medıkter jaıly: Kez kelgenin qorǵaýǵa daıynmyn
«Keshe tańerteń jınalys ótkizip, másele boıynsha negizgi sarapshylardy tyńdadym. Shtabta biz Almatydaǵy Ortalyq qalalyq aýrýhanasynda dárigerlerdiń jappaı vırýs juqtyrý jaǵdaıyn taǵy bir ret talqyladyq. Shtab jumysynyń qorytyndysy boıynsha men áriptesterimmen onlaın rejımde kezdesýdi uıǵardym. Keshke osy emhananyń dárigerlerimen sóılestim. Týyndaǵan máselelerdi tyńdap, syndarly áńgime órbittik. Kezdesýge Almaty qalasy ákiminiń orynbasary Erjan Babaqumarov, Eńbek jáne halyqty áleýmettik qorǵaý mınıstrliginiń, Almaty qalalyq densaýlyq saqtaý basqarmasynyń basshysy, kásipodaqtardyń densaýlyq saqtaý uıymdarynyń ókilderi jáne aýrýhananyń medıtsına qyzmetkerleri qatysty», - dep jazdy mınıstr Facebook paraqshasynda.
Máselen mynada eken. Mınıstrdiń jazýynsha aýrýhananyń qyzmetkerleri ústemeaqy alý týrasynda emotsııaǵa toly jazba qaldyrǵan. Óz sózderinde olar vırýsty naýqastardan juqtyrǵanyn kórsetken.
«Osyǵan baılanysty aýrýhana qyzmetkerleri ótemaqy alýǵa úmittenip otyr. Olardyń árbir ótinishin jeke qarastyrdyq. Osy máselege qatysty jaǵdaıdyń kúrdeliligin eskerip, alýan túrli pikirdi tyńdap, men jergilikti atqarýshy organdy (ákimdik) jáne qalalyq densaýlyq saqtaý basqarmasyn Eńbek jáne halyqty áleýmettik qorǵaý mınıstrliginiń 2020 jyldyń 9 sáýirindegi №129 buıryǵyna taǵy bir ret nazar aýdarýǵa shaqyrdym. Ol buıryqta aldyńǵy qatardaǵy dárigerlerge tólenetin jaǵdaılardy, jumys ornyndaǵy ınfektsııalar úshin syıaqylardyń jaǵdaılaryn zertteıtin jáne túpkilikti sheshim qabyldaýǵa múmkindik beretin komıssııalardy qurýǵa barlyq ókilettik berilgen», - dep jazady mınıstr.
Mınıstr osy komıssııalardyń sheshimi boıynsha ótemaqy beriletinin málim etti. Artynsha COVID-19 juqtyrǵan azamattardyń tizimi «Azamattarǵa arnalǵan úkimet» memlekettik korporatsııasyna joldanady.
Eljan Birtanov óz sózinde mundaı táýelsiz komıssııanyń quramyna ákimdiktiń ókilderi, taýarlar men kórsetiletin qyzmetterdiń sapasy men qaýipsizdigin baqylaý departamentiniń (oblystyń bas memlekettik sanıtarlyq dárigeri) ókilderi, oblystyń, respýblıkalyq mańyzy bar qalanyń jáne astananyń densaýlyq saqtaý jónindegi jergilikti memlekettik organynyń, jumyspen qamtý jáne áleýmettik qorǵaý jónindegi jergilikti basqarma nemese bólimniń, «Nur Otan» partııasy, medıtsına qyzmetkerleriniń múddelerin bildiretin úkimettik emes uıymdardyń ókilderi kiretinin eske saldy.
«Qoǵamdyq pikir kóshbasshylaryn, jýrnalısterdi pikirtalasqa qatysýǵa shaqyramyn. Máseleniń sheshimin tabý úshin bul jerde eń aldymen ashyqtyq kerek. Taǵy bir mańyzdy másele – eger medıtsınalyq qyzmetker koronavırýs ınfektsııasyn juqtyrýdyń saldarynan karantınde bolsa, olar kiris kózinen aıyrylmaýy kerek. Bári de zańǵa saı tólenýi tıis», - dedi ol.
Eljan Birtanov sonymen qatar komıssııa tóraǵasy sol komıssııa músheleriniń bergen daýysy boıynsha saılanatynyn jetkizdi. Komıssııa tóraǵasy retinde ákimdik qyzmetkerin, atap aıtqanda ákimniń orynbasary deńgeıindegi adamdy saılaýǵa keńes berilip otyr.
«Osy komıssııa sheshiminen keıin ǵana tólemder boıynsha naqty shara qabyldanady. Jergilikti atqarýshy organnyń jáne densaýlyq saqtaý basqarmasyndaǵy áriptesterden taǵy da suraımyn: Dárigerlerge qıyn kezderde týyndaǵan problemalardy sheshýge kómektesý úshin másele tez arada sheshilse deımiz. Іndetke qarsy kostıýmder máselesin jaqyn arada tekseremiz. Bul jerde kez-kelgen aýrýhana basshylyǵy óziniń medıtsınalyq qyzmetkerlerin jeke qorǵanys quraldarymen qamtamasyz etýge mindetti ekenin atap ótkim keledi. Qurmetti medıtsına salasyndaǵy áriptester, sizden komıssııa sheshimi shyqqanǵa deıin tynyshtyq saqtaýyńyzdy suraımyn. Siz karantınde em qabyldap jatyrsyz. Densaýlyǵyńyzǵa muqııat qarańyz. Tolyq saýyǵý úshin barlyq saqtyq sharasyn qabyldańyz! Siz elge kereksiz!» - dedi Eljan Birtanov.
Mınıstr resmı túrde Densaýlyq saqtaý mınıstrligi dárigerlerdi «qurdymǵa ıterip jatyr» degen jel sózge senbeýge shaqyrdy.
«Kerisinshe biz medıtsına qyzmetkerleriniń ál-aýqatyn esten shyǵarǵan emespiz. Men kez kelgen medıtsına qyzmetkerine qulaq asyp, ony qorǵaýǵa daıynmyn! Kezdesý qorytyndysynan keıin ol nıetimdi uqtyńyzdar degen oıdamyn. Bárińizge rahmet!» - dep túıdi mınıstr.