Eljan Birtanov: Almatyda medıtsınalyq kómekke bólinetin qarajat 1,5 esege artady
«Atap aıtqanda, qalpyna keltirýge baǵyttalǵan em-dom men pallıatıvtik kómekke jumsalatyn qarjy kólemi 7,5 ese, konsýltatıvtik-dıagnostıkalyq kómek – 6,7 ese, statsıonardy almastyratyn kómekke jumsalatyn qarjy – 2,3 ese artady», – dedi Eljan Birtanov búgin qala ákimdiginde mindetti áleýmettik medıtsınalyq saqtandyrý júıesin engizý máseleleri jónindegi aımaqtyq shtab otyrysynda.
Resmı derekterge súıensek, búginde Almaty turǵyndarynyń 95,7% saqtandyrý júıesimen qamtylǵan (halyqtyń kem degende 80% qamtylýy tıis). Qalǵan turǵyndar óz betinshe jarna tólep medıtsınalyq saqtandyrý júıesine qatysa alady. Jarnany aldaǵy ýaqytta jetkizýshi medıtsına mekemelerine ornatylatyn termınaldar arqyly tóleýge bolady.
«Áleýmettik medıtsınalyq saqtandyrý qory» KEAQ Basqarma tóraǵasy Aıbatyr Jumaǵulovtyń aıtýynsha, saqtandyrý júıesin engizýge daıyndyq baǵytynda aýqymdy jumys atqarylǵan. Normatıvtik-quqyqtyq baza jasalyp, úsh deńgeıli medıtsınalyq kómek júıesi bekitildi, mindetti medıtsınalyq saqtandyrýdy engizýge qajetti aqparattyq júıeler iske qosyldy. Qazirdiń ózinde Qor kelisimsharttar men qosymsha kelisimderdi avtomatty túrde jasaýǵa múmkindik beretin fýnktsıonaldy qoldanysqa engizdi. Bıylǵy tamyz aıynan bastap jekelegen qujattarǵa ETsQ kómegimen qol qoıylyp jatyr.
«Jyl sońyna deıin barlyq medıtsına uıymdarynyń aqparattyq júıeleri medıtsınalyq qyzmetti qos paket negizinde kórsetýge jáne saqtandyrý mártebesi týraly málimetti Qordan tikeleı alýǵa daıyn bolýy tıis. Sebebi, mindetti áleýmettik medıtsınalyq saqtandyrýdy engizý barysynda aqparattyq júıelerdiń atqaratyn róli zor», – dep qosty mınıstr.
Kezdesýde almatylyqtar arasynda júrgizilgen áleýmettik saýalnama nátıjesi de sóz boldy. Saýalnamaǵa sáıkes, sońǵy kezde ońtústik astanada saqtandyrý júıesi jaıly estigen turǵyndar sany 60% deıin artqan.
MÁMS júıesin engizýge tehnıkalyq daıyndyq joǵary deńgeıde deýge bolady. Almatydaǵy barlyq medıtsına uıymdary kompıýtermen jabdyqtalǵan, memlekettik emdeý mekemeleri tolyǵymen qajetti aqparattyq júıelerge qosylǵan. Búginde jeke menshik klınıkalarda aqparattyq júıelermen qamtý deńgeıi 66% qurap otyr jáne aldaǵy ýaqytta bul kórsetkish edáýir artady degen boljam bar.
