Eljan Birtanov Almaty oblysyndaǵy menıngıtten adam ólý oqıǵasyna túsinik berdi

ASTANA. QazAqparat -QR Densaýlyq saqtaý mınıstri Eljan Birtanov Almaty oblysynda menıngıtten adamnyń kóz jumýy oqıǵasyna pikir bildirdi, dep habarlaıdy QazAqparat tilshisi.

Mınıstrdiń sózine qaraǵanda, Densaýlyq saqtaý mınıstrliginiń buıryǵyna sáıkes, aýyr jaǵdaıdaǵy naýqastar eń jaqynda ornalasqan medıtsınalyq uıymǵa jetkizilýi tıis.

«Balaǵa qatysty oqıǵada jaqyndaǵy Talǵar aýrýhanasyna jetkizý talpynysy boldy. Alaıda sábıdiń anasy ózi Almatyǵa baǵyt alyp, sol jerden jedel járdem shaqyrtty. Osy oraıda qansha ýaqyt joǵalǵandyǵy aıqyn kórinip tur. Al onyń týysqanyna qatysty oqıǵaǵa toqtalsaq, atalǵan áıeldiń sózi boıynsha, naýqasty Talǵardan Qaskeleńge jetkizbek bolǵan. Osy jaǵdaı boıynsha biz tekserý júrgizemiz», - dedi Eljan Birtanov.

Bul rette E. Birtanov menıngıtten adamdardyń ólimi boıynsha árbir oqıǵaǵa saraptama júrgiziletinin atap ótti.

«Eger de zańbuzýshylyqtar bolsa, quqyq qorǵaý organdary da tıisti sharalardy atqarady. Sonymen birge Almaty qalasy prokýratýrasy qoldanystaǵy standarttardyń oryndalýyna qatysty tekserýdi bastady. Sondyqtan da tergeý sharalary taıaýda ǵana bastalǵandyqtan, naqty nátıjelerdi qazir aıta almaımyn», - dep túıdi vedomstvo basshysy.

Esterińizge sala keteıik, Almaty oblysynda 19 jastaǵy qyz menıngokkok ınfektsııasynan kóz jumdy. Al onyń aldynda Almatyda 5 jasar balanyń menıngıtten ómiri qıyldy. Bala aýrýdyń birden asqynatyn túrine shaldyqqan.

Budan buryn habarlanǵandaı, mınıstr 2018 jyly Qazaqstanda menıngıtten 12 adam kóz jumǵanyn aıtty.