Eljan Birtanov: Alǵashqy medıtsınalyq kómek kórsetýde bizge patsıentterdiń pikiri mańyzdy

ASTANA. QazAqparat - Qazaqstanda medıtsınalyq-sanıtarlyq alǵashqy kómek kórsetýde Densaýlyq saqtaý mınıstrligi úshin eń aldymen patsıentterdiń pikir mańyzdy. Mundaı pikirdi Elordada ótip jatqan Medıtsınalyq-sanıtarlyq alǵashqy kóómek jónindegi jahandyq konferentsııada QR Densaýlyq saqtaý mınıstri Eljan Birtanov aıtty, dep habarlaıdy QazAqparat tilshisi.

Mınıstr konferentsııa barysynda «Medıtsınalyq-sanıtarlyq alǵashqy kómekti kórsetýdi damytýda Qazaqstanyń tájirıbesi qandaı» degen suraqqa jaýap berdi.

«Álbette, biz medıtsınalyq-sanıtarlyq alǵashqy kómekti kórsetý mindetteri boıynsha ártúrli amaldardy aıqyndap aldyq. Bizdiń jumys eń aldymen patsıentterge beıimdele daıarlanǵan. Naqty alǵashqy medıtsınalyq-sanıtarlyq kómekti alyp otyrǵan adamdardyń pikirleri biz úshin asa mańyzdy. Árıne, bul pikirlerdi eksheı kele, biz qaı tusta qandaı kemshilikter baryn anyqtaı otyryp, qaı tusta jumysty kúsheıtý kerektigin anyqtaımyz. Máselen, sozylmaly aýrýy bar adamdardyń pikirlerin jınaý arqyly biz tıimdi josparlardy ázirleýge qol jetkizemiz», - deıdi Eljan Birtanov.

Aıta ketsek, elordada búgin medıtsınalyq-sanıtarlyq alǵashqy kómek jónindegi Jahandyq konferentsııa ótip jatyr. Jahandyq konferentsııaǵa álemniń 146 elinen medıtsına salasynyń basshylary men bilikti mamandary kelip otyr. Olardyń qatarynda Dúnıejúzilik densaýlyq saqtaý uıymynyń bas dırektory Tedros Adhanom Gebreıesýs, ıÝNISEF atqarýshy dırektory Genrıetta For, DDU Eýropa óńirlik bıýrosynyń dırektory Jýjanna ıAkab qatysýda.

Buǵan deıin jıynda QR Densaýlyq saqtaý mınıstri Eljan Birtanov jahandyq konferentsııada Almaty deklaratsııasyn tolyqtyratyn jańa Astana deklaratsııasy qabyldanatynyn jetkizgen edi.