Eljan Birtanov aqmolalyq dárigerlermen elektrondy qujat almasýdy talqylady
Kókshetaý qalalyq aýrhanasynda ótken kezdesýge oblys ákiminiń orynbasary Aına Mysyrálimova, oblystyq densaýlyq saqtaý basqarmasynyń basshylary, jergilikti aýrýhanalardyń bas dárigerleri men qyzmetkerleri qatysty.
Kezdesýde densaýlyq saqtaý mınıstri Elbasy Joldaýyndaǵy densaýlyq saqtaý salasyn damytý, onyń ishinde «Adamı kapıtal-jańǵyrý negizi» atty jetinshi tarmaqtaǵy mindetterge toqtaldy. E.Birtanovtyń sózinshe, Aqmola oblysyndaǵy medıtsınalyq mekemeler aǵymdaǵy jyldyń tamyzyna deıin tolyq elektrondyq qujat almasý formatyna kóshýi tıis.
«Bıylǵy qańtar aıynan bastap, elimizdiń Qaraǵandy, Qostanaı, Batys Qazaqstan jáne Aqmola oblystarynda qaǵazsyz densaýlyq saqtaý júıesi pılottyq jobasy júzege asyrylýda. Osy joba aıasynda óńirdegi medıtsınalyq mekemeler tamyz aıyna deıin elektrondyq qujat almasý formatyna tolyq kóship bitýi tıis. Bul emhanalardaǵy uzyn sonar kezek pen medıtsınalyq qyzmet sapasyn arttyrý máselesin sheshýge kómektesedi. Ol keler jyldan bastap elimizdiń ózge óńirlerinde de qolǵa alynatyn bolady», - dedi mınıstr.
Aqmola oblystyq Densaýlyq saqtaý basqarmasynyń basshysy Sáýle Qısyqovanyń deregi boıynsha, óńirde 48 medıtsınalyq mekeme bar, onyń 46-sy - densaýlyq saqtaý basqarmasynyń qaramaǵynda. Qaǵazsyz qujat almasýdy júzege asyrý úshin «Keshendi medıtsınalyq aqparat júıesi» baǵdarlamasyn ıgerý qolǵa alynýda.
Medıtsına qyzmetkerlerimen ótken kezdesýde Eljan Birtanov mindetti medıtsınalyq saqtandyrý, kadr tapshylyǵy jáne dárigerlerge tıisti jalaqy tóleý, bilikti mamandardy baspanamen qamtamsyz etý máselelerin de tilge tıek etti. Ásirese, mindetti medıtsınalyq saqtandyrý salasynda saqtandyrylmaǵan azamattardyń kóptigi basty másele bolyp otyrǵanyn atap ótti.
Sonymen qatar, densaýlyq saqtaý mınıstri usaq aýrýhanalar men emhanalar salǵannan góri, qazirgi zamańǵy kópsalalaly aýrýhana ashqan tıimdi ekenin taǵy bir eskertti.
