Elvıra Ázimova: «Zańdy óreskel buzý» degen uǵymnyń mazmuny zań deńgeıinde belgilenýi tıis

ASTANA. KAZINFORM – «Zańdy óreskel buzý» degen uǵymnyń mazmuny zań deńgeıinde belgilenýi tıis. Bul týraly Parlament palatalarynyń birlesken otyrysynda Konstıtýtsııalyq sot tóraǵasy Elvıra Ázimova aıtty. 

«Sot tóreligin iske asyrýdyń konstıtýtsııalyq qaǵıdattary turǵysynan sýdıalardyń tártiptik jaýaptylyq negizderin odan ári naqtylaý oryndy dep tanyldy. «Zańdy óreskel buzý» degen uǵymnyń mazmuny zań deńgeıinde belgilenýi tıis. Zań deńgeıindegi yqtımal shekteýler azamattyń aqparat alý quqyǵynyń bolýy men maqsatyna, ásirese aqparat pen onyń kózderi azamattardyń quqyqtarymen jáne bostandyqtarymen, olarǵa ártúrli quqyqtyq májbúrleý sharalaryn qoldanýmen nemese qoǵamdyq mańyzy joǵary máselelermen baılanysty bolǵan jaǵdaılarda qaýipsiz bolýy tıis», - dedi ol.

Onyń atap ótýinshe, konstıtýtsııalyq baqylaý nátıjeleri zań shyǵarý protsesi jáne zańnamalyq usynystardy ázirleý, sondaı-aq qoldanystaǵy zańdardyń jáne basqa da normatıvtik quqyqtyq aktilerdiń qoldanylý tıimdiligine baǵa berý úshin mańyzdy quqyqtyq derekkóz sanalady. Konstıtýtsııalyq sot sheshimderin memlekettik bılik sýbektilerine mindetti túrde jiberý konstıtýtsııalyq zańdylyqty qamtamasyz etý jóninde shuǵyl sharalar qabyldaý úshin belgi bolyp eseptelinedi.

«Sottar men quqyq qorǵaý organdary óz tájirıbesinde konstıtýtsııalyq baqylaý organynyń qorytyndy sheshimderin qatań saqtaýǵa jáne qoldanýǵa tıis. Búgingi tańda Parlament 5 zańnyń erejelerin Konstıtýtsııaǵa sáıkes keltirdi. Qalǵan zańnamalyq usynystar aalatalardyń qaraýynda nemese Úkimet deńgeıinde kelisý satysynda. Sýdıalarǵa qatysty tártiptik is aıasynda materıaldardy qaraý rásimderine ókildiń qatysý múmkindigi týraly túzetýler Parlamentte qaralýda. Sondaı-aq azamattardyń memlekettik qyzmettiń jekelegen túrlerine túsýine baılanysty keıbir shekteýler talqylanýda», - dedi Elvıra Ázimova.