Elvıra Ázimova depýtattarǵa birqatar zańnamalyq aktige ózgerister engizýdi usyndy

ASTANA. KAZINFORM — Parlament palatalarynyń birlesken otyrysynda Konstıtýtsııalyq sot tóraǵasy Elvıra Ázimova depýtattarǵa birqatar zańnamalyq aktige ózgerister engizýdi usyndy.

— Qazirgi ýaqytta depýtattar bastama etken birneshe zań jobasyna Konstıtýtsııalyq sottyń quqyqtyq ustanymdary men tujyrymdaryna baılanysty zańnamalyq usynystar toptamasy engizilip qoıyldy, — dedi ol.

Osy oraıda Konstıtýtsııalyq sot tóraǵasy zań shyǵarý kún tártibi aıasynda depýtattarǵa mynadaı máselelerdi de qaraýdy usyndy:

1. Sot protsesinde alqabılerdi aýystyrý tártibine, balanyń ultyn anyqtaýǵa jáne kórsetýge, bala asyrap alý ınstıtýtyn jetildirýge jáne alımenttik mindettemelerdi oryndaýǵa qatysty quqyqtyq ustanymdardy eskere otyryp, Qylmystyq-protsestik, Neke (erli-zaıyptylyq) jáne otbasy týraly kodeksterge jáne olarmen baılanysty bacqa da zańnamalyq aktilerge ózgerister engizý týraly.

2. Oıyn bıznesin, sondaı-aq muragerlik pen saqtandyrý máselelerin retteýdegi quqyqtyq ekiushtylyqty joıý maqsatynda Azamattyq kodekske ózgerister engizý týraly.

3. Áleýmettik kodekske jumys istemeıtin ata-ananyń jas balaǵa tikeleı kútim jasaǵan ýaqytyn jasyna baılanysty zeınetaqy tólemderin taǵaıyndaý úshin eńbek ótilinde esepke alýǵa, sondaı-aq qazirgi jaǵdaılardy eskere otyryp, belgili bir sanattaǵy adamdardy áleýmettik qorǵaý tásilderin qaıta qaraýǵa qatysty ózgerister engizý týraly.

4. Saqtandyrýǵa jáne zeınetaqy jınaqtaryn qorǵaýǵa qatysty erejeler bóliginde azamattyq jáne áleýmettik zańnama normalary arasyndaǵy quqyqtyq kollızııany joıý týraly.

5. Memlekettik qyzmetke kirýge qatysty ótelgen nemese alynǵan sottylyqtyń quqyqtyq saldary týraly máseleni qaraý.

6. Qazaqstan azamattarynyń jeke paıdalaný úshin kólik quraldaryn ýaqytsha ákelýine;

— jeke jáne zańdy tulǵalardyń jer ýchaskelerin jaldaý konkýrstaryna qatysý sharttaryna;
— qylmystyq-atqarý júıesinde adam quqyqtarynyń saqtalýyna qatysty máselelerdi quqyqtyq retteý týraly.

7. Parlamenttiń kelesi sessııasy aıasynda zań jobalarynyń tujyrymdamalyq negizdemelerin jáne quqyqtyq monıtorıng nátıjelerin qaraý kezinde Konstıtýtsııalyq sottyń quqyqtyq ustanymdaryn esepke alý týraly.

— Normalardyń quqyqtyq aıqyndylyǵy, mólsherlestigi jáne boljamdylyǵy qaǵıdaty — zańǵa degen senimniń negizi jáne konstıtýtsııalyq quqyqtardy tıimdi iske asyrýdyń kilti ekenin atap ótkim keledi. «Zań jáne Tártip» qaǵıdaty «konstıtýtsııalyq zańdylyq» uǵymynyń mazmunyn quraıtyn qoǵam men memleket ómiriniń, jeke tulǵany qurmetteýdiń tujyrymdamalyq qaǵıdalaryna negizdelgen. Ata Zańnyń qaǵıdattary men normalary quqyqtyq tártip pen mádenıettiń basty ózegi bolyp qala beredi. Bizdiń ortaq mindetimiz — tıimdi konstıtýtsııalyq baqylaý jáne zańnamalyq den qoıý arqyly memlekettik ımmýnıtetti nyǵaıtý, — dedi KS tóraǵasy.

Buǵan deıin Elvıra Ázimova Konstıtýtsııalyq sotqa azamattardan jıi túsetin ótinishterdi ataǵan edi.

Sondaı-aq onyń aıtýynsha, Konstıtýtsııalyq sot qyzmetine kiriskennen beri 400-ge jýyq qaýly qabyldady.