«Elusive» nemese «Qazaq thunder» - Eleýsinovtiń kásipqoı bokstaǵy laqap aty qandaı bolady
ASTANA. QazAqparat - Kásipqoı boksqa aýysqan Danııar Eleýsinovtiń boks álemindegi laqap atynyń qandaı bolatyny anyqtalýda, dep habarlaıdy «QazAqparat» HAA tilshisi.
«Laqap atty tańdaýda ortaq sheshimge kelýge bolady degen oıdamyz. Promoýterler bizben aqyldasady. Bizdiń tarapymyzdan da usynystar bolýy múmkin. Bizde usynys bolmasa, promoýterlerdiń ózderi bergen usynysty qarastyrýǵa bolady. Eleýsinov bolǵannan keıin múmkin «Elusive» (Ustatpas, qolǵa túspes), bolmasa Eddıdiń (promoýter Eddı Hırn - avt.) ózi usynǵandaı «Qazaq thunder» (Qazaq naızaǵaıy) degen laqap atty alýymyz múmkin. Ony aldaǵy ýaqytta aqyldasyp, sheshetin bolamyz. Jaqyn arada belgili bolady», - dedi boksshy Astanada ótken baspasóz máslıhatynan keıin «QazAqparat» HAA tilshisine.
Eske sala ketsek, búgin Danııar Eleýsinovtiń kásipqoı bokstaǵy promoýteri belgili boldy. Boksshymyzdyń promoýteri brıtandyq Eddı Hırn. Eddı Hırn sýper aýyr salmaqta WBA Super, IBF jáne IBO nusqasy boıynsha álem chempıony Entonı Djoshýanyń (20-0, 20 KO), jeńil salmaqtaǵy WBA Super jáne IBF chempıony Raıan Barnet (18-0, 9 KO), jartylaı orta salmaqtaǵy IBF nusqasy boıynsha burynǵy álem chempıony Kel Brýk (37-2, 26 KO) pen orta salmaqtaǵy WBA nusqasy boıynsha burynǵy chempıony Denıel Djeıkobstyń (33-2, 29 KO) promoýteri bolyp tabylady.
