Aqmola oblysynyń 50-den astam turǵyny memlekettik nagradamen marapattaldy
KÓKShETAÝ. KAZINFORM - Kókshetaýda Respýblıka kúnine arnalǵan saltanatty jıyn ótti. Іs-shara barysynda óńirdiń áleýmettik-ekonomıkalyq damýyna eleýli úles qosqan 50-den astam aqmolalyq memlekettik nagradamen marapattaldy.
Oblys turǵyndaryn elimizdiń basty memlekettik merekesimen quttyqtaǵan Aqmola oblysynyń ákimi Marat Ahmetjanov Respýblıka kúniniń aıryqsha mánin atap ótti. Bıyl bul mereke elimizdiń memlekettik egemendigi týraly Deklaratsııanyń qabyldanǵanyna 35 jyl tolýymen tuspa-tus kelip otyr. Atalǵan tarıhı qujat eldiń saıası júıesiniń qalyptasýyna jol ashyp, memlekettik qurylystyń mańyzdy qaǵıdattaryn bekitti.
Óz sózinde óńir basshysy aqmolalyqtardyń oblys pen eldiń damýyna qosqan zor úlesin erekshe atap ótti.
-Sońǵy jyldary Prezıdenttiń bastamasymen túrli baǵyttarda aýqymdy reformalar júrgizilip jatyr. Memleketimizdiń jańa dáýiri bastaldy. Elde «Adal azamat», «Zań jáne tártip», «Taza Qazaqstan» sııaqty iri jobalar júzege asyrylýda. Sizderdiń tabandy eńbekterińizdiń arqasynda biz úlken jetistikterge jettik. Óńirimizdiń damýyna belsendi atsalysyp kele jatqan barshańyzǵa shynaıy alǵysymdy bildiremin, – dedi Marat Ahmetjanov.
Aımaq basshysy sonymen qatar oblys dıqandaryn óńir úshin tarıhı mańyzy bar egin jınaý naýqanynyń tabysty aıaqtalýymen quttyqtady.
«Ýaqtyly qabyldanǵan sharalardyń nátıjesinde dándi daqyldardyń ónimdiligi artty, al egin oraǵy sapaly jáne merziminde júrgizildi. Sonyń nátıjesinde oblysymyz rekordtyq kólemde – 7,6 mln tonna astyq jınady», – dep atap ótti óńir basshysy.
Óz baıandamasynda Marat Ahmetjanov ınvestıtsııa, turǵyn úı jáne áleýmettik qurylys, sondaı-aq basqa da salalardaǵy jetistikterge toqtaldy.
Saltanatty jıyn memlekettik marapattardy tabystaý rásimimen jalǵasty. Prezıdent Qasym-Jomart Toqaevtyń tapsyrmasymen Aqmola oblysynyń ákimi Marat Ahmetjanov aýyl sharýashylyǵy men qurylys salasynyń eńbekkerlerin, densaýlyq saqtaý jáne bilim berý salasynyń ókilderin, sondaı-aq eńbek ardagerleri men qoǵam qaıratkerlerin memlekettik nagradalarmen marapattady.
