Elý jastaǵy velosıpedshi Almatydan Pavlodarǵa 20 kúnde jetti
PAVLODAR. QazAqparat - 50 jastaǵy Asqar Sultanǵazın Almatydan Pavlodarǵa velosıpedpen jetti. Ol jolda 20 kún júrip, barlyǵy 1618 shaqyrymdy eńserdi, dep habarlaıdy QazAqparat pavlodarnews.kz saıtyna silteme jasap.
«Bul velotýrymdy elime, jastarǵa arnaımyn. Jastar da osy ǵajap sport túrimen aınalysyp, salaýatty ómir saltyn ustansa deımin. Men ómir boıy sportpen aınalysyp kelemin. Osyǵan deıin kúrespen aınalystym. Sport adamnyń densaýlyǵyn nyǵaıtyp, tártipke úıretedi», - deıdi Asqar Sultanǵazın.
Asqar Sultanǵazın úshin bul alǵashqy velotýr emes. Osyǵan deıin eki dóńgelekti kóligimen Qazaqstannyń túkpir-túkpirin aralap kelgen. Osylaısha, 10 myńnan astam shaqyrym qashyqtyqty eńsergen. Degenmen ol usynystar tússe de bul sport túrinen arnaıy jarystarǵa qatyspaǵan.
Sportshy Almatydan 11 qyrkúıekte shyǵyp, saǵatyna ortasha 20-25 kılometr jyldamdyqpen júrip otyrǵan. Pavlodarǵa deıin barlyǵy 1618 kılometrdi artta qaldyrǵan.
Asqar Sultanǵazın Pavlodar oblysy Aqqýly aýdanynyń Merǵalym aýylynda dúnıege kelgen. Taıaýda ol velosıpedpen Mekkege jol júrýdi oılastyrýda.
