«Eltaný» ekspedıtsııasy Qaraǵandydan Pavlodar oblysyna attandy

QARAǴANDY. QazAqparat - Qaraǵandyda «Eltaný» respýblıkalyq týrıstik-ólketaný ekspedıtsııasy jolǵa attandy. Bıyl qatysýshylar Pavlodar jáne Shyǵys Qazaqstan oblystaryn aralaıdy, dep habarlaıdy QazAqparat tilshisi.

«Eltaný» ekspedıtsııasy «Rýhanı jańǵyrý» baǵdarlamasy men «Óz jerińdi tany» jobasy aıasynda ótkizilýde. Maqsaty – etnosaralyq toleranttylyq pen qoǵamdyq kelisimniń qazaqstandyq modelin nyǵaıtý, jastardy patrıotızmge tárbıeleý.

Bıyl ekspedıtsııaǵa Abaı oqýlarynyń, «Myń bala», «Alǵysym saǵan, Qazaqstan!» baıqaýlarynyń jeńimpazdary, «Ult qazynasy» jáne «Túrki álemi: Kúltegin jyrlary» festıvalderine qatysýshylar, Qazaqstan halqy Assambleıasynyń «Jańǵyrý joly» respýblıkalyq jastar qozǵalysynyń músheleri, blogerler, jýrnalıster men ǵalymdar qatysty.

Ekspedıtsııa eki negizgi baǵytty qamtıdy. 8-10 qazan aralyǵynda delegatsııa Pavlodar oblysyna barady. Ekspedıtsııa músheleri Baıanaýyl memlekettik ulttyq parkine, Buhar Jyraý kesenesine, Qanysh Imantaıuly Sátpaevtyń murajaıyna, Musa Shormanuly men Máshhúr Júsip kesenesine barýdy josparlaýda. Sonymen qatar Jasybaı kólin, Qońyr áýlıe úńgirin, Saq qorǵandaryn jáne basqa da qasıetti oryndardy kórýdi kózder otyr.

10-12 qazan aralyǵynda ekspedıtsııa Shyǵys Qazaqstan oblysyna attanady. Munda olar Jıdebaı-Bórilidegi Abaı atyndaǵy memlekettik tarıhı-mádenı murajaı-qoryǵyn, Qunanbaı qudyǵyn, Zere men Uljan kesenelerin, Abaı-Shákárim memorıaldyq keshenin, Eńlik-Kebek kesenesin, sondaı-aq Bórilidegi «Alash arystary - Muhtar Áýezov» murajaıyn tamashalaıdy.

Qaraǵandylyqtar osyndaı ólketaný ekspedıtsııalaryna ekinshi jyl qatarynan qatysyp keledi. Ótken jyly olar Buqar Jyraý, Qarqaraly jáne Ulytaý aýdandarynda boldy.