Eltańbany ózgertýge qarjylyq múmkindik bar ma – mınıstrdiń jaýaby

ASTANA. KAZINFORM – Qarjy mınıstri Mádı Takıev «eltańbany ózgertýge el bıýdjetiniń qarjylyq múmkindigi bar ma?» degen saýalǵa jaýap berdi.

«Árıne, múmkinshilik bar. Saraptama júrgizý qajet. Bizde qansha eltańba bar ekendigine saraptama júrgizetin bolamyz. Óıtkeni, olardyń kólemi ártúrli, 40 santımetrden bastap 1 metrge deıin jetedi», - dedi mınıstr agenttik tilshisine saýalyna oraı.

Onyń atap ótýinshe, Úkimet basshysy Qarjy mınıstrliginiń aldyna bıýdjettiń tıimsiz shyǵystaryn qysqartý týraly tapsyrma bergen.

«Tapsyrma boldy. Ony birneshe kezeńge bóldik. Birinshi kezeńde ortalyq memlekettik organdarmen jumys istep, qarap shyqtyq. 301 mlrd teńgeni qysqartamyz. Onyń ishinde ishtegi is-saparlardy, sheteldik is-saparlardy, ıgerilýi tómen jobalardy qysqartý bar. Ázirshe, qysqartylatyny osy soma. Degenmen, áli de qarastyryp jatyrmyz. Ózderińiz bilesizder, bizdiń bıýdjettiń shyǵystary 23,9 trln teńgeni quraıdy. Onyń ishinde 20 trln teńge jalaqyǵa, zeınetaqyǵa, shákirtaqyǵa, járdemaqyǵa tólenedi. ıAǵnı, qysqartylmaıtyn soma», - dedi Mádı Takıev.

Sonymen qatar ol qalǵan 4 trln teńgege jýyq somadan da qysqartý múmkindikteri qarastyrylyp jatyr.

Prezıdent Ulttyq quryltaıdyń úshinshi otyrysyndaǵy sózinde ulttyq biregeıligimizdiń memlekettik rámizderde aıqyn kórinis tapqanyn atap ótken edi.

«Al Eltańbamyzǵa qatysty synı pikirler aıtylyp qalady. Ony Keńes zamanyndaǵy Gerbke uqsatyp jatady. Tym eklektıkalyq, kúrdeli deıdi. Mundaı oıdy el isine beı-jaı qaramaıtyn belsendi azamattar ǵana emes, mamandar da aıtyp júr. Oryndy paıymdar eskerýsiz qalmaýy kerek. Ortaq kelisimge kelgen jaǵdaıda arnaýly komıssııa qurýǵa bolady. Bul komıssııa máseleni jan-jaqty qarastyryp, qoǵamdyq talqylaý ótkizedi. Sosyn Qazaqstannyń jańa Eltańbasynyń jobasyn jasaýǵa ashyq baıqaý jarııalanady», - degen bolatyn Qasym-Jomart Toqaev.