Eltańbany aýystyrýǵa qatysty sheshim qabyldaý komıssııasy qurylady

ASTANA. KAZINFORM – Eltańbany aýystyrýǵa qatysty sheshim qabyldaý komıssııasy qurylady. Bul týraly Úkimet otyrysynan keıingi brıfıngte Qarjy mınıstri Mádı Takıev aıtty. 

«Elbańbany aýystyrýǵa qatysty másele belgili bir kezeńnen beri talqylanyp kele jatqanyn jaqsy bilesizder. Prezıdent Ulttyq quryltaıda atalǵan máseleni talqylaýdy usyndy. Memleket basshysy eger qoǵam bul máselege jappaı qoldaý bildirse, onda ony odan ary talqylaý qajettigin aıtty. Ol úshin arnaýly komıssııa qurylady. Komıssııa atalǵan máseleni tyńǵylyqty qarastyratyn bolady. Eger bul máselege qatysty oń sheshim qabyldanǵan jaǵdaıda, shyǵystaryna qatysty qalǵan jaıttar týyndaıdy», — dedi mınıstr.

Osy oraıda Mádı Takıev elbańbany aýystyrýǵa qansha qarjy jumsalatyndyǵyn, qandaı qarjy kózderinen qarjylandyrylatyndyǵyn aıtpady.

«Aldymen birinshi máseleni sheship alaıyq, odan keıin ekinshisin qarastyramyz», — dedi ol.

Prezıdent Ulttyq quryltaıdyń úshinshi otyrysyndaǵy sózinde ulttyq biregeıligimizdiń memlekettik rámizderde aıqyn kórinis tapqanyn atap ótken edi.

«Eltańbamyzǵa qatysty synı pikirler aıtylyp qalady. Ony Keńes zamanyndaǵy Gerbke uqsatyp jatady. Tym eklektıkalyq, kúrdeli deıdi. Mundaı oıdy el isine beı-jaı qaramaıtyn belsendi azamattar ǵana emes, mamandar da aıtyp júr. Oryndy paıymdar eskerýsiz qalmaýy kerek. Ortaq kelisimge kelgen jaǵdaıda arnaýly komıssııa qurýǵa bolady. Bul komıssııa máseleni jan-jaqty qarastyryp, qoǵamdyq talqylaý ótkizedi. Sosyn Qazaqstannyń jańa Eltańbasynyń jobasyn jasaýǵa ashyq baıqaý jarııalanady», — degen bolatyn Qasym-Jomart Toqaev.