Eltańbamyzda shańyraqtyń sýreti beker turǵan joq – Dýlat Ábildın
NUR-SULTAN, QazAqparat – «Ózine qol jumsamaq bolǵan adamdy qutqaryp qaldyq. Sol kezde otbasylyq qundylyqtar ınstıtýtyn quratyn kez kelgenin túsindik». Elordada ótken otbasy qundylyqtary týraly koých-sessııada sóz sóılegen Dýlat Ábildın osylaı deıdi, dep habarlaıdy QazAqparat tilshisi.
«Osy shara ótken soń 2 qarasha kúni Danalyq otbasylyq qundylyqtar ınstıtýtynyń ashylý rásimi bolady. Odan keıin qaı mektepterde, qandaı dáris, qaı ýaqytta bolatyny anyqtalady. Al búgingi sharada aldaǵy ýaqytta qalaı jumys isteıtinimiz týraly baǵyt-baǵdarymyzdy anyqtap alamyz», - deıdi atalǵan ınstıtýttyń negizin qalaýshy Dýlat Ábildın.
Ol otbasy qundylyqtary ınstıtýtyn ashý týraly ıdeıa qaıdan kelgeni týraly áńgimeledi.
«Biz 2 jyl boıy oılanyp-tolǵanyp, osyndaı ınstıtýt ashý týraly sheshimge keldik. Shamamen bir aı buryn biz tanıtyn birneshe otbasynda qaıǵyly jaǵdaı boldy. Birinshi otbasynda erli-zaıyptylar ursyp qalyp, áıeli ózine qol jumsady. Nátıjesinde kishkentaı balalar anasyz qaldy. Ekinshi otbasynda balalar ózine qol jumsady. Nege olaı bolǵanyn túsinbeı qaldyq, sebebi ol otbasy áleýmettik jaǵdaıy jaqsy, jetistikke jetken otbasy edi. Úshinshi áýlette áıel ózine qol jumsamaq bolyp, Allanyń qalaýymen men qutqaryp qaldym. Osy kezde «2 jyl boıy oıda júrgen ıdeıany búgin júzege asyrmasaq, qashan asyramyz?» degen oı keldi. Sóıtip ártúrli saladaǵy mamandardyń basyn biriktirip, osy máseleni sheshý týraly toqtamǵa keldik», - deıdi kópbalaly áke.
Sharaǵa ártúrli sala sarapshylary, qoǵamdyq uıymdardyń tóraǵalary men músheleri qatysýda.
«Búgingi tańda ınstıtýtymyzda pedagog, psıholog jáne basqa da 30 tájirıbeli maman bar. Olar psıhologııalyq kómek kerek otbasylarǵa tegin qyzmet kórsetip otyr. 2017 jylǵy statıstıka boıynsha, otbasyn qurǵan úsh otbasynyń biri ajyrasyp ketedi. Bul – 10 jyl ishinde dúnıege kelýi múmkin 1 mıllıon balanyń dúnıege kelmegenin bildiredi. Bul – bir ǵana másele. Odan basqa otbasylyq máseleler jeterlik. Otbasy myqty bolsa – ult ta myqty bolady, al ult myqty bolsa – ekonomıkamyz da myqty bolady. Eltańbamyzda shańyraqtyń sýreti beker turǵan joq», - deıdi ol.
Koých-sessııada Danalyq otbasylyq qundylyqtar ınstıtýtynyń naqty keıs-mysaldary arqyly ınstıtýtty damytýdyń strategııalyq máseleleri talqylandy.
Eske sala ketsek, buǵan deıin atalǵan koých-sessııada elimizdiń otbasy qundylyqtaryn damytatyn ınstıtýttarǵa muqtaj ekeni jáne memlekettik organdar men qoǵam arasyndaǵy baılanysty nyǵaıtý kerektigi aıtylǵan bolatyn.
Avtor: Zarına Qaharman
