Eltańba ózgerse de, qoldanystaǵy banknottar eskirgenshe aınalymnan shyǵarylmaıdy – Ulttyq bank

ASTANA. KAZINFORM – Ulttyq banktiń basqarma tóraǵasy Tımýr Súleımenov BAQ ókilderimen ótken baspasóz máslıhatynda Eltańba ózgerse, banknottar men monetalar aınalymyna qalaı áser etetinin aıtty.

«Birinshiden, Eltańba aýysa ma, degen suraqqa jaýap taýyp alý kerek sııaqty. Óıtkeni qazir sol saladaǵy ǵalymdar jumys istep jatyr. Keıin usynys aıtatyn shyǵar, ázirge naqty usynys berilgen joq.  Bul máseleni biz óz sheńberimizde zerdeledik. Qazir aınalymda júrgen banknottar men monetalarǵa qatysty qandaı da bir ózgeris bolmaıdy. Olar eskirip bitkenshe aınalymda bola beredi», - dedi ol jýrnalıst saýalyna bergen jaýabynda.

Onyń aıtýynsha, Eltańba ózgergen kúnniń ózinde moneta shekip, banknot basatyn jańa qondyrǵy alýdyń qajeti bolmaıdy.

«Al Eltańbany ózgertý týraly sheshim naqty qabyldansa, odan keıin shyǵatyn monetalar men banknottardyń dızaıny basqasha bolatyny túsinikti. Qazaqstan banknot fabrıkasyndaǵy qondyrǵy aıtarlyqtaı jaqsy. Sondyqtan onyń tehnıkalyq baptaýlaryn ózgertýde qandaı da bir qıyndyqtar bolmaý kerek. Sáıkesinshe, qosymsha shyǵyndar bolmaıdy», - dedi Tımýr Súleımenov.