Elsııar Qanaǵatov jasóspirimder Olımpıadasyndaǵy qazaq sportshylarynyń basty maqsatyn atady
NUR-SULTAN. QazAqparat – QR Ulttyq Olımpıada komıtetiniń sport dırektsııasynyń dırektory Elsııar Qanaǵatov Lozannadaǵy jasóspirimder arasynda ótetin ІІІ qysqy Olımpıada oıyndaryndaǵy qazaqstandyq sportshylarynyń basty maqsatyn atady, dep habarlaıdy QazAqparat tilshisi.
«Qysqy Olımpıada oıyndaryndaǵy basty maqsat – laıyqty óner kórsetý. Lozannada Olımpıada kestesine saı sporttyq sharalardan bólek, olımpıadalyq yntymaqty nyǵaıtý maqsatynda mádenı sharalar da uıymdastyrylady. Shveıtsarııaǵa osy ýaqytqa deıin ózin-ózi tanyta bilgen kil myqtylar ketip bara jatyr. Sportshylar el namysyn qorǵaı alar degen úmittemiz. Jasóspirimder arasyndaǵy Olımpıada oıyndarynda biz árdaıym medal ıelenip keldik. Sol sebepti, ýaqyttan ozyp, osynsha medal alamyz demeı-aq qoıaıyn. Sportshylar saqadaı saı», - dedi Elsırıa Qanaǵatov «Saryarqa» velogtreginde ótken saltanatty jıynda.
Onyń aıtýyna qaraǵanda, aldaǵy qysqy Olımpıada oıyndarynda sporttyń jańa túrleri tanystyrylady.
«Aldaǵy oıyndarda 3h3 hokkeı sekildi sporttyń jańa túrinen saıys ótedi. Onda bizdiń sportshylar Qazaqstannyń namysyn qorǵap qana qoımaı, ózge eldiń atletterimen birge halyqaralyq komanda sapynda óner kórsetedi. Shańǵy bessaıysy bar. Mundaı saıystar jasóspirimder komandalary arasynda turaqty túrde ótkiziledi», - dedi ol.
Elsııar Qanaǵatov jas sportshylar osyndaı satylardan ótip, úlken Olımpıadaǵa daıyndalatynyn aıtyp ótti.
«Bastysy, sportshylar osy qalyptarynan taımaı, aldaǵy kezeńderge sátti ótse deımiz. Jas sportshyny ábden daıyndap alyp, jarys jolynan shyǵyp ketý oıymyzda joq. Álbette, sport bolǵannan keıin ártúrli jaǵdaı kezdesedi. Jas sportshylardy osy shaqta qatty sharshatyp, keıin olar sportty tastap ketetin jaǵdaılar kezdesedi. Órenderimiz úshin taqym qysyp, medalmen kelýin kútemiz», - dedi ol.
Eske sala ketsek, Qazaqstannyń jasóspirimder quramasy Shveıtsarııanyń Lozanna qalasynda jasóspirimder arasynda ótetin ІІІ qysqy Olımpıada oıyndaryna attandy. Sportshylardy saltanatty túrde shyǵaryp salý rásimi «Saryarqa» velotreginde ótti.
