Elsııar Qanaǵatov qazaq dzıýdoshylary Olımpıadaǵa qalaı tańdalatynyn aıtty

ASTANA. KAZINFORM – Olımpıada oıyndaryna daıyndyq jónindegi shtab basshysy Elsııar Qanaǵatov qazaq dzıýdoshylary Olımpıadaǵa qalaı tańdalatynyn aıtyp berdi.

«Frantsııa astanasy Parıj qalasynda ótetin Olımpıada oıyndaryna elimizdiń atynan qatysatyn dzıýdoshylar anyqtalatyn kún de alys emes. Qazirgi tańda álemniń ár túkpirinde olımpıadalyq reıtıngilik týrnırler ótip jatyr. Olardyń qatarynda qazaqstandyq tatamı sheberleri de bar. Olımpıadaǵa baratyn dzıýdoshylar osy reıtınng arqyly anyqtalady. Naqtyraq aıtsaq, ár salmaqtan olımpıadalyq reıtıngte aldyńǵy 17-orynǵa kóterilgen dzıýdoshylar bara alady. Qazirgi tańda bul kórsetkishke upaılary jetip turǵan erler arasynda da, áıelder arasynda da sportshylarymyz bar. Sondyqtan dzıýdodan da kemi 6-7 joldama alamyz dep oılaımyn. Qazir eshkimniń atyn atap, túsin tústeýdiń qajeti joq. Sebebi, olımpıadalyq reıtnıg ár jarys saıyn ózgerip otyrady. Eń bastysy sportshylarymyz sol básekelerde úzdik óner kórsete bilýleri kerek», - dedi Elsııar Qanaǵatov.

Sonymen qatar shtab basshysy qazaq dzıýdoshylaryn alda taǵy da birqatar mańyzdy jarystar kútip turǵanyn, onda Olımpıadaǵa upaılary beriletinin de atap ótti.

«Bizdiń dzıýdoshylarǵa áli de kóptegen múmkindikter bar. Aldaǵy kúnderi, ıaǵnı 3-5 mamyr aralyǵynda Dýshanbede, «Úlken dýlyǵa» týrnıri, 10-12 mamyr aralyǵynda elordamyzda «Qazaqstan barysy», Úlken dýlyǵa dodasy, 19-24 mamyr aralyǵynda Abý-Dabıde álem chempıonaty ótedi. Sondyqtan dzıýdoshylarymyzǵa áli de olımpıadalyq upaılaryn jaqsartýǵa úlken múmkindikteri bar», - dedi shtab basshysy.

Esterińizge sala keteıik, 3-5 mamyr kúnderi Tájikstan astanasy Dýshanbe qalasynda ótetin dzıýdodan Grand Slam týrnırinde el namysyn erler quramasynan kimder qorǵaıtynyn jazǵan bolatynbyz.