Elsııar Qanaǵatov: Kanvon Olımpıadasynyń júldegerleri memlekettik syıaqydan qur qalmaıdy
KANVON. KAZINFORM – Ońtústik Koreıanyń Kanvon qalasynda ótip jatqan IV qysqy jasóspirimder Olımpıadasy da bel ortasyna jaqyndap qaldy. Búginge deıin Qazaqstan quramasy 1 altyn, 1 qola medal alyp úlgerdi. Osy oraıda KAZINFORM tilshisine Ońtústik Koreıadan Kanvon-2024 mıssııasynyń jetekshisi, Qazaqstan UOK sport departamentiniń basshysy Elsııar Qanaǵatov arnaıy eksklıýzıv suhbat berip, qysqy sport tóńiregindegi máselerdi, jasóspirim Olımpıadasynyń jeńimpazdary men júldegerlerine beriletin syıaqylar, Olımpıadalyq shtaptyń atqaryp jatqan mindetteri týraly baıandap berdi.
– Elsııar Baımuhametuly, Kanvon Olımpıadasy qalaı ótip jatyr?
– Ońtústik Koreıanyń Kanvon qalasynda ótip jatqan IV qysqy jasóspirimder Olımpıadasy óte joǵary deńgeıde ótip jatyr dep aıtýǵa bolady. Osy úlken keshendi jarysqa 78 memleketten oıynshylar kelgen. Qazaqstan osy Olımpıada oıyndaryna 41 sportshysyn úkilep báıgege qosyp jatqan jaıy bar. Qazirge deıin qorjynymyzda 1 altyn, 1 qola medal bar. Sonymen birge sportshylarymyz arasynan 5, 6, 7, 10-oryndardan kórinip jatqan oıynshylarymyz da bar. Meniń oıymsha bul da jaman kórsetkish emes.
Bizdiń shtap óz tarapynan sportshylarǵa da, jattyqtyrýshylarǵa da barlyq jaǵdaı jasap jatyr. Kúndelikti sportshylarymyzdyń jaǵdaıyn qadaǵalap, dárigerlik kómek, ýaqytyly tamaqtaný, jarystarǵa kedergisiz óz ýaqytynda baryp qatystyrý, jarystardan keıin keshiktirmeı jataqhanalarǵa alyp qaıtý, ýaqytynda demaldyrý, barlyǵy bizdiń jiti qadaǵalaýymyzda.
Sondaı-aq ár kúni jarys aıaqtalǵannan keıin jattyqtyrýshylarmen sol kúngi jarystardy talqylap, tarazylap, qaı jerden qandaı olqylyqtar bolǵanyn keńesip, kelesi kúnge jospar quramyz. Eger bir olqylyq bolǵan jaǵdaıda sonyń orynyn toltyrýǵa kúsh salamyz.
Bul jasóspirimder Olımpıadasy bolǵandyqtan tek jarystar ǵana emes, basqa da kóptegen mádenı is-shara bolyp jatyr. Biz bul jaǵyn da qalys qaldyrmaı, sondaı sharalarǵa jastarymyzdy qatystyryp, ár elden kelgen balalar arasynda ózara tájirıbe almasyp, bir-birimen jaqsy qarym-qatynas, túsinistik ornatýǵa kúsh-jigerimizdi salamyz.
– Jarystardyń ádildigine sport mamany retinde qandaı baǵa beresiz?
– Olımpıada oıyndary óte joǵary deńgeıde ótip jatyr. Tóreshilerdiń ádildigine eshqandaı kúmánimiz joq. Qazirge deıin sportshylarymyzdyń arasynan da, jattyqtyrýshylar arasynan da tóreshilerge eshqandaı shaǵym bolǵan emes. Sondyqtan doda ádil ótip jatyr dep senimmen aıtýǵa bolady.
– Qazir qorjynymyzda 1 altyn, 1 qola medal bar. Taǵy qandaı sport túrlerinen medal bolyp qalýy múmkin?
– Bul jasóspirimder Olımpıadasy aıaqtalýǵa áli aptadan astam ýaqyt bar. Alda ózge de sportshylarymyz baq synaıtyn jarystar kútip tur. Sondyqtan bizdiń sportshylar áli de júldege talasa alady degen senimdemiz. Mysaly, hokkeı, short-trek, frıstaıl-mogýldan jaqsy nátıje kútemiz.
– Kanvondaǵy jastarymyzdyń qazirgi jetistikterine qarap, «bolashaq chempıondar tárbıelep jatyrmyz» dep senimmen aıta alamyz ba?
– Ázirge qorjynymyzǵa túsken 1 altyn, 1 qola júldege qarap, elimizdiń barlyq oblysynda qysqy sport túri keremet damyp ketti dep aıtýǵa bolmas. Bizde ásirese shalǵaı mekenderde, aýdandyq, aýyldyq jerlerdi bylaı qoıǵanda keıbir oblys ortalyqtarynyń ózinde qysqy sport mektepteriniń sany óte az. Balalardy jattyqtyratyn jattyqtyrýshylardyń jalaqysy da tómen. Qazir Týrızm jáne Sport mınıstrligi bul máselelerdi sheshý joldaryn qarastyryp jatyr.
Meniń oıymsha, elimizde qysqy sportty jaqsy damytýǵa barlyq múmkindikter bar. Biz, ózderińiz bilesizder 2011 jyly Almaty, Astana qalalarynda Qysqy Azıada oıyndaryn, odan keıin Dúnıejúzilik qysqy Ýnıversıadany joǵary deńgeıde uıymdastyra bildik. Osy jarystardy qabyldaý aıasynda Almaty men Astana qalalarynda kóptegen qysqy sport alańdary, jattyǵý ortalyqtary salyndy. Al ózge óńirlerde ondaı ortalyqtar kemshil bolyp otyr. Ásirese, qysqy sport túrlerin damytatyn mektepter mańynda sondaı ortalyqtar bolýy kerek. Ár oblysta daıyndalatyn ortalyqtar bolsa, bizdiń buqaralyq sport ta, qysqy sport ta qazirgiden de jaqsy damyǵan bolar edi. Áli de kesh emes, aldaǵy ýaqytta bu máseleniń barlyǵy sheshimin tabady degen úmittemiz.
– Elimizde jasóspirimder Olımpıadasynyń jeńimpazdary men júldegerlerine qandaı syıaqy taǵaıyndalǵan?
– Elimizde kez-kelgen álemdik dodalarda top jarǵan sportshylarǵa naqtyly belgilengen qarjylaı syıaqy bar. Jasóspirimder arasyndaǵy Olımpıada oıyndarynyń jeńimpazdary men júldegerleri de memlekettik syıaqydan qur qalmaıdy.
Atap aıtsam, chempıon bolǵan sportshyǵa 10 myń AQSh dollary, bapkerine 5 myń AQSh dollary, ekinshi oryn alǵan júldegerge 5 myń, bapkerine 3 myń AQSh dollary beriledi. Al úzdik úshtikten kóringen sportshylarymyz 3 myń AQSh dollaryn ıelense, bapkerine 2 myń dollar beriledi.
Sonymen qaratr jeńimpaz sportshylarǵa árbir federatsııalar, árbir jergilikti ákimdikter ózderi sheshim qabyldap, ártúrli baǵytta, marapattaýǵa ruhsat etilgen. Sondyqtan, jeńimpaz atanyp, elimizdi, óz týǵan aýylymyzdy, óńirimizdi qýantyp jatsa, eshkim sol sportshyny jerge qaratpaıtyny anyq. Bizde jetistikke jetken sportshylardy marapattý jaqsy dástúri bar.
– Áńgimeńizge rahmet!
