Elshilik qyzmetkerleri únemi baılanysta boldy – Ýkraınadan elge oralǵan qazaqstandyq

NUR-SULTAN. QazAqparat – Jańa ǵana Polsha arqyly Ýkraınada júrgen bir top qazaqstandyq elordaǵa ushyp keldi. Sonyń biri - Aslan Hastaev. Elge aman-saý jetken jerlesimiz alǵashqy áserin bólisti, dep habarlaıdy QazAqparat tilshisi.

«Ýkraınaǵa jumys babymen barǵanmyn. Ózim Qazaqstanda Shý qalasynda turamyn. Ýkraındar - óte jyly halyq, qıyn sátte qoldaý kórsetti. Bizdi aman saý elge ákelgen Úkimetke alǵys. Ýkraına shekarasynda 30 avtobýs adam, eki kún boıy shekara kezeginde turdyq. Men Dnepropetrovsk qalasynda boldym, ol jerden Lvovqa jettim. Odan ári bizdi elshilik ókilderi avtobýspen jetkizdi», - deıdi Aslan Hastaev.

Sóz arasynda jerlesimiz adamnyń kez kelgen ýaqytta tótenshe jaǵdaıǵa tap bolatynyn aıtty.

«Meniń baqytyma oraı, áleýmettik jelidegi chat arqyly kútpegen jerden taksı tabyldy. Lvovqa deıin 455 dollar aldy. Bastysy - elge jettik, elshilik qyzmetkerleri únemi baılanysta boldy. Qazir 1 saǵattan soń poıyz keledi, maǵan vokzalǵa jetip úlgerý kerek», - deıdi ol.

Buǵan deıin habarlaǵanymyzdaı, Ýkraınadaǵy Qazaqstan azamattarynyń ekinshi legi elordaǵa keldi.

Olar Polshanyń Katovıtse qalasynan Atyraýǵa, odan ári el astanasyna jetti. Bortta 120 eresek jáne 4 bala bar.

Elge aman saý jetken otandastarymyzdy elorda jurty qýanyshpen qarsy aldy.

Aıta keteıik, elimizdiń syrtqy ister mınıstrligi qazaqstandyq azamattardy Ýkraınadan otanyna qaıtarý jumysyn jalǵastyryp jatyr.