Elshilik qurylysyndaǵy aqsha jetispeýshiligi aldyńǵy jyly anyqtalǵan - QR SІM
ASTANA. QazAqparat - QR Syrtqy ister mınıstrligi Qazaqstannyń Belarýs Respýblıkasyndaǵy elshiliktiń aǵa esepshisi Asqar Seıdýalıevtyń qamaýǵa alynǵany qatysty resmı túsinikteme berdi,dep habardaıdy QazAqparat tilshisi.
«2012 jyldyń qarashasymen 2016 jyldyń qańtary aralyǵynda A.Seıdýalıev Qazaqstannyń Respýlıkasynyń Belarýstaǵy elshiliginde aǵa esepshi qyzmetin atqardy. 2015 jyly jeltoqsan aıynda Mınsk qalasyndaǵy QR elshiliginiń jańa ǵımaraty salynǵannan keıin qabyldaý komıssııasy aqshanyń jetispeýshiligin anyqtaǵan. Ol týraly elshi E.Bólegenov QR Syrtqy ister mınıstrligine habardar etti. Osyǵan baılanysty 2016 jyly qańtar-aqpan aılarynda elshiliktiń qarjy-sharýashylyq qyzmetine tekseris júrgizilip, tısti materıaldar Bas prokýratýraǵa joldanǵan bolatyn», - delingen resmı aqparatta.
2016 jyly mamyr aıynda QR Respýblıkalyq bıýdjettiń atqarylýyn baqylaý jónindegi Esep komıteti men QR Qarjy mınıstrliginiń qarjylyq baqylaý komıteti atalǵan zań buzýshylyqtardy rastap, A.Seıdýalıevke qatysty barlyq materıaldardy Sybaılas jemqorlyqqa qarsy kúres jónindegi Ulttyq bıýroǵa jibergen. Búginde elshiliktiń jańa ǵımaraty tolyǵymen paıdalanýǵa berildi. Bas merdiger - «AktıvBıznesPlıýs» tarapynan barlyq mindettemeler oryndaldy. Belarýstaǵy Qazaqstan elshiligi tergeý sharalaryna barynsha atsalysyp keledi.
Aıta keteıik, kúni keshe Sybaılas jemqorlyqqa qarsy is-qımyl jónindegi Ulttyq bıýrosy Belarýstaǵy Qazaqstan elshiliginiń aǵa býhgalteri A. Seıdýalıevtiń ustalǵanyn habarlaǵan. Ol 2012-2015 jyldary aralyǵynda elshilik ǵımaratynyń qurylysyn júrgizgen bas merdiger «AktıvBıznesPlıýs» AAQ-qa jalǵan shyǵys kassalyq orderler jasaý jolymen bıýdjettiń 207 myń dollar qarjysyn urlaǵan. Budan bólek, Seıdýalıev atalǵan kezeńde Belarýs Respýblıkasynyń salyq organdarynyń elshilikke qosarlanǵan qun salyǵy retinde qaıtarylǵan 474 883 AQSh dollaryn da zańsyz ıemdenip ketken. Urlanǵan qarjynyń jalpy somasy 681 883 dollardy quraıdy. Qazirgi ýaqytta A.Seıdýalıev QR QІK 128-babyna sáıkes Astana qalalyq ІІD-niń ýaqytsha oqshaýlaǵyshyna qamaldy. Sotqa deıingi tergeý amaldary júrgizilýde.
