Elshiler úshin jańa dıplomatııalyq qalashyq salyp jatyrmyz - Prezıdent

ASTANA. QazAqparat - Astanada jańa dıplomatııalyq qalashyq salynýda. Bul týraly búgin Aqordada Qazaqstanda tirkelgen dıplomatııalyq mıssııalar men halyqaralyq uıymdardyń basshylarymen kezdesý barysynda Elbasy Nursultan Nazarbaev aıtty, dep habarlaıdy QazAqparat tilshisi.

«Búginde barlyq dıplomattyń memlekettik jumysy balalarymyzdyń, nemerelerimizdiń jaıly ǵalamsharda, qolaıly jaǵdaıda ómir súrýlerine baǵyttalǵan. Sondyqtan sizderdiń Qazaqstandaǵy jumystaryńyz óte mańyzdy dep esepteımin. Sizder óz elderińiz ben Qazaqstannyń qarym-qatynasyn nyǵaıtý úshin jumys isteısizder, sol úshin taǵy bir márte alǵysymdy bildiremin. Sizderge zor qurmetpen qaraımyz», - dep atap ótti Prezıdent.

Sonymen qatar Memleket basshysy sheteldik elshiler úshin elordada jańa dıplomatııalyq qalashyq qurylysy bastalǵanyn atap ótti.

«Aǵymdaǵy jyly elshilerimiz úshin barynsha jaqsy jaǵdaı jasaý, qaýipsizdigin qamtamasyz etý úshin arnaıy dıplomatııalyq qalashyq qurylysyn bastadyq. Menińshe, kelesi jyly biz ony aıaqtaıtyn bolamyz. Ol elordanyń qolaıly jerinde ornalasady», - dep atap ótti Nursultan Nazarbaev.