Elshi Túrkııany qaralap jatqan aqparattarǵa senbeýge shaqyrdy
ASTANA. QazAqparat - Túrkııanyń Qazaqstandaǵy Tótenshe jáne ókiletti elshisi Nevzat Ýıanyk qazaqstandyqtardy Túrkııadaǵy búlikti Erdoǵannyń ózi uıymdastyrǵan bolýy yqtımal degen «qara úgitke» senbeýge shaqyrdy.
«Bul lańkestik uıymnyń álemde keń qurylymy bar. Ókinishke oraı, olarda «teris úgit-nasıhat» jasaýǵa jáne qoǵam pikirine yqpal etýge qabiletteri bar. (...) Baýyrlas jáne dos memleketterge keletin bolsaq, Qazaqstan jáne Qazaqstan halqy bizdiń elge qatysty aıtylyp jatqan mundaı «qara propagandalarǵa» senbeıdi dep úmittenemiz», - dedi elshi búgin Astanada ótken baspasóz máslıhatynda.
«Búlik barysynda bizdiń eldiń prezıdenti jatqan qonaqúı de bombylandy. Bombylar Parlamentke jáne basqa da úkimettik ǵımarattarǵa tastaldy. (...) Qazirgi ýaqytqa deıin osyndaı «qara úgit-nasıhattar» tyıylmaı, bizdiń eldi qaralaıtyn oqıǵanyń jańa nusqalary aıtylyp jatyr», - dedi N.Ýıanyk.
Aıta keteıik, 15 shilde kúni Stambulda áskerı búlik oryn alyp, 190-nan astam beıbit azamat qaza tapty, 1400-den astam adam jaralandy. Qazirgi ýaqytta 6 myńnan astam búlikshi ustaldy, tóńkeris barysynda 100-ge jýyq búlikshi óltirildi.
