Elshi Seıtimov tájik-aýǵan shekarasynda mert bolǵan qazaqstandyq jaýyngerler rýhyna taǵzym etti
ASTANA. QazAqparat - Dýshanbede 1995 jyldyń 7 sáýirinde tájik-aýǵan ýchaskesindegi TMD-nyń syrtqy shekarasyn kúzetý boıynsha áskerı boryshyn óteý barysynda mert bolǵan qazaqstandyq jaýyngerlerge arnalǵan eskertkishke gúl shoqtaryn qoıý rásimi ótti.
Bul jaıynda Qazaqstannyń Tájikstandaǵy Elshiliginiń baspasóz qyzmetinen málim etti, dep habarlaıdy QazAqparat.
Sharaǵa Tájikstannyń ardager-ınternatsıonalıster odaǵynyń, «Báıterek» Tájikstandaǵy qazaqtardyń qoǵamdyq uıymynyń ókilderi, Tájikstan shekara qyzmetiniń ardagerleri jáne Qazaqstan Elshiliginiń qyzmetkerleri qatysty.
Jınalǵandar aldynda sóz sóılegen Qazaqstannyń Tájikstandaǵy Elshisi Nurlan Seıtimov qazaq memleketi de, halqy da óz batyrlarynyń esimin máńgi este saqtaıtyndyǵyn basa aıtty. Tájikstan tarabynan sóz alǵan azamattar da qaza tapqan qazaqstandyq jaýyngerlerdiń erligi ár ýaqytta tájik halqynyń jadynda bolatyndyǵyn atap ótti.
Aıta keteıik, 1993 jyldyń 15 sáýirinde QR Joǵarǵy keńesiniń «Tájik-aýǵan ýchaskesindegi TMD-nyń syrtqy shekarasyn kúsheıtý týraly» qaýlysymen sany 500 adamǵa jetetin jeke qurama atqyshtar batalony quryldy. Batalon quramyna desantshylardan bólek shekarashylar men ishki ásker bólimsheleri kirdi. Al onyń komandıri laýazymyna maıor A.Volodın taǵaıyndaldy. 1995 jyldyń 7 sáýirinde Qazaqstan Іshki áskeriniń qurama rotasy Tájikstannyń Pshıhavr shatqalynda modjahedter tarapynan shabýylǵa ushyrady. Jaýdyń kúshi basym bolǵan urysta qazaqstandyq 17 áskerı qyzmetshi oqqa ushty, 33-i aýyr jaraqattandy. Jalpy 1993-2001 jyldary aralyǵynda 8 jylǵa sozylǵan bitimgershilik operatsııasy barysynda sodyrlarmen arada oryn alǵan qarýly qaqtyǵystarda 32 qazaqstandyq sarbaz qaza taýyp, kópshiligi jaraqat aldy. Osy jyldar ishinde 8,5 myńnan astam qazaqstandyq áskerı qyzmetshiler tájik jerinde boryshyn ótedi.
