Elshi QR Prezıdentiniń Medınedegi qulshylyǵy týraly aıtyp berdi

ASTANA. QazAqparat - Qazaqstannyń Saýd Arabııasyndaǵy Tótenshe jáne Ókiletti elshisi Baqyt Batyrshaevtyń aıtýynsha, Saýd Arabııasynyń Mekke men Medınesine barǵan memleket basshylaryna erekshe jaǵdaı jasamaıdy. Olar úshin tek qaýipsizdik sharalaryn ǵana kúsheıtedi, dep xabarlaıdy QazAqparat tilshisi.

«Kez kelgen memlekettiń basshysy, onyń ishinde bizdiń Elbasymyz bar, óziniń musylmandyq paryzyn qatardaǵy qarapaıym musylman retinde atqarady. Oǵan din jaǵynan eshqandaı jeńildik joq. Árıne, memleket basshysy bolǵannan keıin tıisti qaýipsizdik sharalary qolǵa alynady. Degenmen, ol úshin meshitti tolyǵymen bosatpaıdy. Onyń óziniń tártibi bar, aınalasynda ásker qorǵap júredi. Biraq ol sharalar basqa musylmandardyń jaǵdaıyna kedergi keltirip, olardyń jolyn jaýyp tastap, qulshylyǵyn toqtatpaýy tıis. Ondaıǵa jol berilmeıdi. Óıtkeni árbir musylmannyń paryzy bar», - dedi Baqyt Batyrshaev QazAqparat tilshisine bergen suxbatynda.

Onyń aıtýynsha, qasıetti Qaǵbaǵa tek memleket basshylary men bedeldi ǵulamalardy ǵana kirgizedi. Sondaı-aq elshilerge de kirýge ruqsat bar.

Aıta keteıik, jaqynda Memleket basshysy Nursultan Nazarbaev Saýd Arabııasyna resmı saparmen barǵan bolatyn. Sol kezde N.Nazarbaev Medınedegi Muxammed (s.ǵ.s) paıǵambardyń meshitinde bolyp, sol jerde namaz oqyp shyqqan.