Elshi: Qazaqstan dıplomattaryna shetelde jumys isteý óte jeńil
ASTANA. QazAqparat - 2016 jyly Qazaqstan-Serbııa iskerlik keńesi qurylady. Bul týraly búgin Astanada ótken baspasóz máslıhatynda Qazaqstan Respýblıkasynyń Vengrııadaǵy elshisi, Makedonııadaǵy jáne Serbııadaǵy Tótenshe jáne Ókiletti Elshisi mindetin qosa atqarýshy Nurbah Rústemov málim etti.
«Shynyn aıtsam, qyzmetimniń birinshi kúninen bastap maǵan atalǵan elderde jumys isteý ońaı boldy. Jalpy qazaqstandyq dıplomattarǵa shetelde jumys isteý jeńil. Nelikten? Sebebi Qazaqstannyń, bizdiń Elbasymyz Nursultan Nazarbaevtyń abyroıy óte joǵary», - dep atap ótti N. Rústemov.
Onyń sózine qaraǵanda, áriptesterimen qandaı da bir taqyrypty talqylaý kezinde problemalarǵa tap bolmaǵan eken. «Bizde kezdesýler de, ashyq pikir almasýlar da ótedi jáne biz barlyq taqyryptardy óte jeńil talqylaımyz. Eger de qandaı da bir túsiniksiz máseleler týyndasa, biz olardy kez kelgen deńgeıde baısaldy túrde talqyǵa salamyz», - dedi Elshi.
Onyń aıtýynsha, atalǵan úsh elmen saýda-ekonomıkalyq qatynastardy damytýda keıbir qıyndyqtar týyndaıtyn kezder bolady. Bul rette N. Rústemov osy másele boıynsha dılomattar tıisti jumystardy atqaryp jatqandyǵyn atap ótti.
