Býdapeshtte qazaq dıasporasyna eki eldiń seriktestigi týraly dáris ótkizildi
ASTANA. KAZINFORM — Majarstandaǵy jetekshi joǵary oqý oryndarynda bilim alyp júrgen 30-dan astam qazaqstandyq stýdent Lakıtelek Halyq ýnıversıtetinde («Lakitelek Népfőiskola») uıymdastyrylǵan arnaıy kezdesýge qatysty, dep habarlaıdy «Otandastar qorynyń» baspasóz qyzmeti.
Sharaǵa «ELTE», «Corvinus», «Debrecen», «BUEB» jáne «Pecs» ýnıversıtetteriniń stýdentteri bardy. Іs-shara Majarstan Parlamentiniń vıtse-spıkeri Shandor Lejaktyń patronajdyǵymen ótti.
Kezdesýge Qazaqstannyń Majarstandaǵy Tótenshe jáne Ókiletti elshisi Abzal Saparbekuly, «Otandastar qory» KeAQ prezıdenti Danııar Qadyrov, sondaı-aq Lakıtelek Halyq ýnıversıtetiniń professory ári Majarstan Parlamentiniń vıtse-spıkeri Shandor Lejak qatysty. Sonymen qatar, Qazaqstan mádenıeti men ulttyq sport túrlerine qyzyǵýshylyq tanytatyn majarlyq azamattar da shaqyryldy.
Іs-sharanyń negizgi maqsaty — shetelde bilim alyp júrgen qazaqstandyq jastarmen baılanysty nyǵaıtý, olardyń otansúıgishtik rýhyn kóterý, mádenı jáne bilim salasyndaǵy yntymaqtastyqty keńeıtý.
Kezdesý barysynda elshi Abzal Saparbekulynyń qazaq-majar strategııalyq seriktestigi týraly dárisi tyńdaldy, stýdentter Qazaqstan týraly ázirlegen baıandamalaryn usyndy.
Sonymen qatar Janargúl Fenveshı jetekshilik etken «Majar-qazaq etnosport jáne mádenıet qaýymdastyǵynyń» asyq atý jáne toǵyzqumalaq oıyndary boıynsha sheberlik sabaqtary ótkizildi.
«Lakitelek Népfőiskola» (Lakıtelek Halyq ýnıversıteti) — Majarstandaǵy eń iri mádenı-aǵartýshylyq ortalyqtardyń biri. Oqý orny 1991 jyly Majarstan Parlamentiniń vıtse-spıkeri, qoǵam qaıratkeri jáne jazýshy Shandor Lejaktyń bastamasymen quryldy. Ýnıversıtet Lakıtelek qalasynda ornalasqan jáne táýelsiz bilim berý ári mádenı mekeme retinde jumys isteıdi.
«Lakitelek Népfőiskola»-nyń negizgi mıssııasy — gýmanıtarlyq jáne mádenı bilimdi damytý, ulttyq dástúrlerdi saqtaý, sondaı-aq qoǵamdyq dıplomatııa men halyqaralyq jastar baılanystaryn nyǵaıtý. Ýnıversıtet jastar men eresekterge arnalǵan bilim berý baǵdarlamalaryn júzege asyrady, konferentsııalar, gýmanıtarlyq forýmdar, mádenı sharalar, tarıh, ádebıet, mádenı mura jáne ulttyq bolmys taqyryptarynda oqytý baǵdarlamalaryn ótkizedi. Sondaı-aq túrki álemi elderimen yntymaqtastyqty qamtıtyn halyqaralyq almasýlarǵa belsendi qatysady. «Lakitelek Népfőiskola» «Hungarikum Liget» uıymynyń qurylymyna kiredi. Bul uıymdy da Shandor Lejak basqarady. Qor kampýsty damytý, mádenı jáne ǵylymı ortalyqtar qurý, qoǵamdyq jáne ǵylymı bastamalardy qoldaý baǵytynda jumys isteıdi.
«ELTE» ýnıversıtetiniń Halyqaralyq qatynastar fakýltetiniń 3-kýrs stýdenti Táýekel Shadııar qazaqstandyq jastardyń bastamasy týraly pikir bildirdi.
— Majarstanda oqıtyn qazaqstandyq stýdentterdi biriktirý úshin «Quryltai Hu» qaýymdastyǵyn qurdyq. Aı saıyn mádenı-bilim sharalaryn ótkizemiz. Sondaı-aq Eýropanyń 11 elindegi qazaqstandyq stýdenttik uıymdardy biriktiretin «Qazaq Society» qaýymdastyǵynyń múshesimiz. Maqsatymyz — birlikti nyǵaıtý jáne baılanystardy keńeıtý, — dedi ol.
«Corvinus» ýnıversıtetiniń «Bıznes ákimshiligi jáne menedjment» mamandyǵynyń 4-kýrs stýdenti Elnara Israıl óz áserimen bólisti.
— Biz stýdentter jıi bas qosamyz. Elshilik uıymdastyratyn jáne ózimiz ótkizetin is-sharalarǵa belsendi qatysamyz. Merekelerde jınalyp beshbarmaq daıyndaımyz, tek qazaqsha sóılesemiz. Osyndaı basqosýlar Otandy umyttyrmaıdy. Qazaqstan — árqashan júregimde, — dedi ol.
Kezdesý aıasynda «Otandastar qory» prezıdenti Danııar Qadyrov Majarstandaǵy «Barys» majar-qazaq qoǵamy men «Majar-Qazaq» mádenı uıymdarynyń jetekshilerimen jáne belsendilerimen júzdesti. Jıyn sońynda qazaq uıymdaryna «Qorjyn» jobasy aıasynda dombyralar men ulttyq kıimder tabystaldy.
Budan buryn Majarstan prezıdenti Tamash Shýıok Kazinform tilshisine bergen eksklıýzıvti suhbatynda eki el arasyndaǵy strategııalyq áriptestiktiń keleshegi týraly paıymyn aıtty.